Shillong, K’Lyngkot 03
Ka Meghalaya ka la ïoh pdiang ïa ka khusnam ha ka kyrdan kaba lai ha ka ODOP Awards 2023 kaba la pynlong da ka Department for Promotion of Industry and Internal Trade ha Pragati Maidan, New Delhi.
Kane ka jingïoh jingithuh ka jylla ka dei halor ka jingtrei shitom ha kaban kyntiew ïa kawei ka mar na kawei ka District ne One District One Product (ODOP). Ïa kane ka khusnam, ka Jylla ka la pdiang ha ka jingïalang ba long ha ka Sngi Balang, ha kaba u Dr. Vijay Kumar D, IAS, Commissioner & Secretary ka Sorkar Jylla u la leit ban pdiang ïa ka khusnam na ka bynta ka sorkar Meghalaya.
Ïa ka Aatmanirbhar Bharat Utsav bad National ODOP Awards la plie da u Dr. S Jaishankar, Myntri Korbar ri ka India. Ka jingai ïa kane ka khusnam ka long ban rakhe ïa ka jingtrei shitom jong ki jylla, ki Union Territory, District, & Indian Mission ha kaban pynurlong ïa ka jingïohi jngai jong ka Aatmanirbhar Bharat lyngba ki sienjam kiba la shim da ka ODOP.
U Myntri Rangbah ka jylla u Conrad K Sangma, u la ong, “Ka jingïoh khusnam ka long ka jingai mynsiem ïa ki nongrep bad ki nongthaiñ jingthaiñ da ki kti, kiba la trei met bad mynsiem ban pynmih ïa ki mar kiba kyrpang ki jongki kiba la pyninam ha ki rynsan hapoh ka ri bad shabar ka ri. Ka jingseisoh ka jong ngi ha ka ODOP Award ka leit sha ka jingshim ïa ki sienjam, ki prokram, ka jingpynmih ïa ki mar kiba kyrpang, Geographic Indication (GI) bad ka jingkhlaiñ ha ka ban pynïaid ïew ïa ki. Ka sorkar Meghalaya ka pynpaw ka jingsngewnguh ïa ka Department for Promotion of Industry bad Internal Trade bad ka Ministry of Commerce kaba la ai jingithuh bad jingïaroh ïa ka jingtrei jong ka jylla”.
Ka Meghalaya ka trei met bad mynsiem ban kyntiew ïa ka ODOP (One District, One Product) lyngba kiba bun ki sienjam bad ka sorkar kala pynsngewthuh paidbah halor ka skhim ODOP, ban pynthikna ba ki mat kin long kiba don ïa ka kyrdan, ban pynbiang ïa ki jingdonkam ha kaba ïadei bad ka jingpynmih bad jingpynïaid ïew bad ban pyntreikam ïa ka rukom rejistar.
Ki ïoh ruh ïa ka jingkyrshan ha kaba ïadei bad ka jingpynmih ïa ki mar kiba kyrpang bad kiba phylla, ka jingwanrah ïa ki kor teknoloji, pynlong ïa ka jingïalam kai ban ïoh ïa ki jingtip kiba bniah, workshop bad kiwei kiwei.
