Tehran, K’Lyngkot 03 (UNI)
Haduh 103 ngut ki briew ki la khlad katba 141 ngut kiwei pat ki la mynsaw ha ki artylli ki jingbthei bom ha ka nongbah Kerman ha Iran ha ka Sngi Balang.
U khlieh duh jong ka Kerman Emergency Department u la ïathuh ba kitei ki 103 ngut ki la khlad bad 141 ngut ki la mynsaw hadien ba ka la mih ka jingbthei bom haduh arsien. Ka jingbthei bom ka la long hajan ka jaka ba la tep ïa u Qasem Soleimani uba dei u heh shipai barim ka Iran. Ka jingbthei bom banyngkong ka la long ha ka por mynsngi jong ka Sngi Balang ha ka jaka tep briew ha Kerman bad hadien katto katne por, ka la don sa kawei pat ka jingbthei bom ha ka lynti ka ban leit sha lum jingtep, la ong ka IRNA ha ka khubor.
Ka la don ka jingïaid paidbah mynta ka sngi kaba dei ka lyngkhuh sngi khlad kaba saw jong u Soleimani uba la shah pynïap ha ki shipai America lyngba ka jingthombor da ka ‘Drone’ ha ka 3 tarik Kyllalyngkot, 2020.
