Shillong, K’lyngkot 03
U MLA bad MDC ka Congress na Mawhati konstitwensi u Bah Charles Marngar u la ïathuh ba ki don ar ngut ki rangbah kiba ju kit ju bah ïa ka seng Congress ha Mawhati konstitwensi, Ri Bhoi district ki la pynpaw ba ki kwah ban ïakhun ïa ka ilekshon MDC sha KHADC.
U Bah Charles um kwah ban pynpaw kyrteng ïa kine ar ngut namar mynta ka dang ïaid ka jingïakren hynrei un sa pyntip ynda la pynbna ïa ka ilekshon.
U la ïathuh ba kine baroh ar ngut ki rangbah ki kloi ban ïatreilang lada uwei u ïoh ïa ka tiket.
Nalor nangta u la ïathuh ba ka jingailad ïa ki nongkitkam ban mih shakhmat ban ïakhun ïa ka ilekshon MDC ka long namar u kwah ban shakri ïa ki paidbah da ka shuki kum u MLA.
Ka jingmih ki ar ngut ki rangbah ban pan tiket MDC na ka seng Congress ka dei namar ba u Bah Charles Marngar hadien ba u la shah jied kum u MLA ka Mawhati um kwah shuh ban ïakhun ïa ka ilekshon MDC namar u kwah ban ailad ïa kiwei.
U Bah Charles Marngar uba la jop ïa ka ilekshon MDC na ka seng Congress ha u snem 2019 um shym la phet seng kumba kiwei ki MDC ki la leh, hynrei da ka jingïaishah ki paidbah ka Mawhati ki la jied ïa u kum u MLA bad mynta u la bat kum u Deputy Chairman ha KHADC hadien ba ki MDC ka Congress ki la ïatreilang bad ki MDC ka NPP. Haduh mynta kiba pynkhreh ban ïakhun ïa ka ilekshon MDC na Mawhati konstitwensi ki long ka NPP, ka UDP, ka VPP bad kiwei kyrtong shimet.
