Shillong, K’lyngkot 03
Ka Hynñiewtrep National Liberation Council (HNLC) ha ka Sngi Balang ka la pynbna ba ka la weng noh na ka jingïakren ïasuk kaba dang ïaid mynta bad ka Sorkar Pdeng lem bad Sorkar Jylla namar ka jingbym lah ban pynurlong ïa ki jingdawa jong ka seng.
“Ngi sngewsih ban pyntip sha phi ba ngim banse ban weng noh na ka jingïakren ïasuk bad ka Sorkar jong phi. Ïa kane ka rai la shim namar ka jingbym lah ban pynurlong ïa ki jingdawa jong ngi,” la ong ki nongïalam ka seng ha ka shithi ba la phah sha ka tnad kam pohïing ka Sorkar Pdeng lyngba u nongaibuit ka tnad (MHA) ka Thaiñ Shatei Lam Mihngi, u A.K. Mishra.
Ki nongïalam ha kajuh ka por ki la pynpaw ka jingsngewkhia ba lada ïa kitei ki mat ba hakhmat eh ym pat lah ban pynbeit, kata ki jingdawa (political demands) jong ka seng ruh kin sa shah pynkut noh.
“Da ka mynsiem kaba khia ba ngi la sakhi ïa ka jingïakren ïasuk ka la poi sha ka bynta ba kongsan. Watla katta, ngi sngew ba la pynbor ban bteng biang ïa ka jingïakhun jong ngi da kaba kieng atiar,” la ong ha ka shithi.
Ïa katei ka shithi ba la soi da u Chairman cum C-in-C (Bobby Marweiñ) bad General Secretary cum Publicity Secretary ka seng, Bah Saiñkupar Nongtraw la phah ruh sha u Myntri Rangbah ka Jylla, Myntri ka tnad kam pohïing ka Sorkar Jylla bad ki ksiang – Bah P.S. Dkhar bad Bah Sadon K. Blah.
Dei ha u Rymphang 2022 ba ka HNLC ka la tyrwa ban ïakren ïasuk bad ka Sorkar khlem da buh kyndon, bad ka Sorkar Meghalaya hapoh ka jingïalam u Conrad K. Sangma ka la pdiang sngewbha ïa kane.
Na ka liang ka HNLC ka la thung ïa u President ka Hynñiewtrep National Youth Front (HNYF), Bah Sadon K. Blah, ban long kum u nongmihkhmat ka seng ha ka jingïakren katba ka Sorkar India bad Sorkar Meghalaya ki la thung ïa u A.K. Mishra bad u Bah Peter S. Dkhar kum ki ksiang. Hashuwa ban sdang ka jingïakren bapura (Formal Peace Talks), ka la don ka jingïakynduh hapdeng ki ksiang bad ki nongïalam ka HNLC. Ka sien banyngkong ba ki nongïalam ka HNLC ki la sdang ïa ka jingïakren bapura bad ka Sorkar India bad Sorkar Meghalaya ka dei ha ka 24 tarik Jylliew, 2023.
Hapdeng jong ka jingïakren ïasuk, ka HNLC ka la pynbna ba u Vice-Chairman ka seng, uba la ïalam ïa ka kynhun ban ïakren, u Bah Manbhalang Jyrwa, u la iehnoh kam, bad ha ka jaka jong u, ka seng ka la thung noh ïa u Bah Teimiki Laloo. Ym tang katta, ka HNLC ka la pynpaw ïa ka jingpyrshah halor ka jingshah khot hajir jong ki nongïalam ha ki ïingbishar ha kaba ïadei bad ki mukotduma ba don pyrshah ïa ki, bad ki la dawa ruh na ka Sorkar ba ka dei ban weng noh shuwa ïa kitei ki mukotduma.
Ka Sorkar ka la pynpaw ruh ïa ka jingkwah jong ka ba u Chairman & Commander-in-Chief ka seng, u Bah Bobby Marweiñ lem bad u General Secretary & Publicity Secretary, u Bah Saiñkupar Nongtraw, ki dei ban wan lang sha ka miej jong ka jingïakren.
Hynrei ka HNLC ka la kren shai ba katba ka Sorkar kam pat weng ïa ki mukotduma pyrshah ïa u Bah Bobby bad u Bah Saiñkupar lane katba ym pat pynbiang ïa ka saiñdur jong ka soskular sangeh ïasiat, kine ki nongïalam kin ym wan shakhmat ban ïashim bynta ha ki jingïakren.
