Shillong, K’Lyngkot 03
Ka Khasi Students’ Union (KSU) Laban Circle ka la pynpaw ba ka jingkylla ktem dih drok bad leh kam awria jong ka Shelter Home kaba don ha Kenches Trace, Shillong ka dei namar ka jingbym shimkhia jong ka Shillong Municipal Board kaba la shu ieh kumto.
Ha kaba ïadei bad kane, ka KSU Laban ha ka Sngi Balang ka la phah ruh da ka dorkhas sha u Chief Executive Officer (CEO) ka Shillong Municipal Board halor ka jingkyndang ka seng ïa ka shelter home ha Kenches Trace hadien ba la paw pyrthei ki video ha rynsan social media halor ki jingdih drok ki kynthei bad shynrang ha katei ka jaka bad ha kajuh ka por ba katei ka jaka ka la kylla ka ktem drok bad ki kam leh awria.
Ka KSU ha ka dorkhas, ka la pynpaw ba dei na ka liang Shillong Municipal Board ba kam shym la lah ban peit bniah bad jurip na ka por sha ka por ba kane ka jaka ka la kylla ka ktem ki nongbuaid, nongdih drok bad haduh ban kylla ka jaka die met. Ka seng ka dawa ban dei ban buh noh da ki nongap pahara (Security Guard) ha kane ka jaka ha ryngkat ki nongpeit nongkhmih (caretaker) ban lait na ka jingrung jingmih laitlan. Ka seng ka la maham ruh ba ym bit ban pynkylla ïa kane ka jaka kum ka ktem ban ïadih kyiad bad bad leh kam awria.
Ka seng ka la ban jur ruh ba ki don katto katne ki briew kiba sah ha ka Shelter Home kaba dei ka jaka na bynta ki briew ki bym don ïing don sem bad ki bym kot bor ha ka kamai kajih, hynrei don pat ki briew kiba don la ka kali kamai, ka kam ka jam hynrei ki sah ha kine ki jaka namar ba ki ïoh ei lut nadong shadong haduh ka bam ka dih. Kane pat kan pynduh jaka ïa kito kiba donkam hok ïa kum kine ki shelter home. Ka Seng ka la dawa ba ïa kum kita ki briew dei ban pynmih mardor bad dei ban don ki kyndon kiba biang ba ïa kum kino ki jait briew ba lah ban pynrung ha kine ki Shelter Home bad ym dei ba kin lah ban sah shyrta hynrei dei ban buh da ka por ba ynda ki la biang ka kamai kin hap ban mih na katei ka jaka. Ka seng ka la pynsngew ruh ba ka Dorbar Shnong Kenches Trace Oxford bad Rilbong kam shym la ai jingmynjur ban don kane ka Shelter Home bad kane ka la mih ha ka por Covid kum ka Temporary Shelter Centre hynrei mynta pat ka la kylla da kumwei. Nalor nangta ka jingbym lah ki bor pynïaid ban tehlakam ïa ki briew ba wan sah ha katei ka jaka ka buh jingma ïa ki nongshong shnong jong ka thaiñ. La pynkut ka kyrwoh ba la pyllait da u Publicity Secretary ka KSU Laban Circle u samla Franky Rani.
