Shillong, Kyllalyngkot:
Ka shnat Hima Nongwah-Mawtamur kaba hap ha ka Sohïong Lyngdohship ka la wan shakhmat lyngba ki lad pathai khubor ban pynshai halor ki jingkren kynthoh ïa ki nongsynshar hima jong ka Hima Sohïong bad khamtam eh ïa u Bah Esternsing Jana Nongbet uba bat kum u Sirdarship jong ka shnat Hima Nongwah Sohïong Lyngdohship da u Bah Forcaster Nongrang uba dei u Secretary barim kane ka shnat.
Haba kren sha ki lad pathai khubor ha ka Sngi Ba-ar ha Shillong Press Club, u Bah Esternsing Jana Nongbet uba dei u Sirdar jong kane ka shnat, u la ïathuh ba ha ka jingshisha ma u bad u Bah Forcaster Nongrang ki la ïa ithuh-ithaw bad sdang ïatreilang naduh u snem 2019 ïa ki kam hima-sima bad kiwei kiwei ki kam ruh kumjuh. Kim ju ïadon kano-kano ka jingkren sniew ne ki jingkren pynsngewsih iwei ïa iwei hynrei ki la ïatreilang ryngkat da ka jingbit, jingbiang bad ka jingïasngewthuh jingmut lang.
U Bah Nongbet u la ong ba kaba pynlyngngoh ngaiñ ïa u ka long ba ka jingpynmih khubor jong u Bah Nongrang lyngba ki lad pathai khubor ha ka 27 tarik ka la long kum ka jingkynthoh ïa u shimet.
Kumta ha kaba ïadei bad ka jingshah kynthoh, u Bah Nongbet u la pynshai ba um ju don kano-kano ka daw pyrshah ïa u Bah Nongrang naduh ki por ba ki la ithuh paralok tad haduh ba u Bah Nongrang u la ïaleh ïa ka ilekshon MLA ha u snem 2023 ruh, u Bah Nongbet u la ai jingkyrshan met bad mynsiem ïa utei u rangbah watla u khlem shym poi sha ka jingjop.
“Ngi la ïatrei shitrhem ha ka jingïaleh ïa ka ilekshon bad na ka liang jong nga ruh katba lah nga la ïarap hi ka pisa ban ïarap lem na ka bynta ka jinglut jingsep”, la ong u Bah Nongbet.
Hadien ka jingshah rem jong u Bah Nongrang ha ka ilekshon, katkum ka jingkyrpad jong ki Kur u Bah Nongrang, u Bah Nongbet u la kular ban ai T. 20 lak kum ka jingïarap, bad ïa katei ka T. 20 lak la ai ha u Bah Nongrang ha ryngkat ka jingïasoi lang ba u la dep ban ïohpdiang lut ïa katei ka pisa.
Ha kaba ïadei pat ka jingkynthoh jong u Bah Nongrang shaphang ka kam hima-sima, u Bah Nongbet u la ong ba katkum ka aiñ jong ka Khasi Hills Autonomous District Council (KHADC) 1959, ka la kdew shai ba shisien ba la ïakhun ïa ka ilekshon yn nym lah shuh ban bat kam hapoh ka sima-hima. Kumta u Bah Nongrang naduh katei ka por ba u la thmu ban ïakhun ïa ka ilekshon, la shimti noh ïa ki kam jong u Bah Nongrang kum u Secretary da u Assistant Secretary ban pyntyllun shakhmat ïa ki kam.
U Bah Nongbet u la kyrpad ïa ki paidbah ka Nongwah-Mawtamur bad ïa ka hima baroh kawei ba kim dei ban pdiang ïa ki jingkren kynthoh jong u Secretary barim bad kum ka hima kan pynïaid shaphrang ïa ki kam.
“Ïa u Bah Forcaster Nongrang ngim shym la isih ne kyntait bad haduh mynta u dang dei hi u Myntri jong ka hima namar nga la ai ka syrnod ïa u ha ka 14 tarik u bnai Nailur 2019 bad la pynkupbor ïa u kum u Myntri jong ka shnat Hima Nongwah-Mawtamur”, la ong u Bah Nongbet.
Shuh shuh u Bah Nongbet u la kyrpad ïa u Bah Nongrang ba lada u kwah ban ïatreilang ryngkat, u dei ban wan shakhmat na ka bynta ban saiñdur-saiñdar ïa ki kam hima-sima.
