Shillong K’lyngkot 03
Ka Sorkar Jylla ka la dep phah peit bniah ha ki riewshemphang ka IIT Guwahati haba ïadei bad ka jingtei ïa ka ïew ha Jowai bad katkum ka kaiphod, ka pyni ba ki païa jong kane ka jingtei kaba la sahteng la bun snem ki dang biang.
Ka ïew ha Jowai lane Jowai Market ka dei kaba hap ha ka jingpeit ka JHADC, hynrei ka Sorkar Jylla ka la shimkhia lang noh namar kane ka projek ka dei ruh kaba la bei pisa lyngba ka tnat DoNER ka Sorkar Pdeng ha ki snem ba la leit namarba ka kwah ba kane ka projek kan ïaid noh shakhmat na ka bynta ka jingmyntoi ki paidbah.
La ong ba ka tnat DoNER ka khlem pyllait pisa shuh hadien ba ka la pyllait ïa ka pisa ha ka wat banyngkong (first installment).
Haba ïakren bad u MLA ka Jowai u Bah Wailadmiki Shylla, u la kubur ba kane ka projek ka la sahteng bad ha ki khyndiat snem ka don ruh ka jingeh namar kane ka kam ka don hapdeng ka mukotduma.
“Hynrei hadien ba la sngewthuh jingmut, na ka liang u kontraktor u la weng noh ïa ka mukotduma bad la don noh ka jingsiew ïa ka pisa kaba dang dei ban siew sha u kumba T.30 lak ne T.35 lak,” la ong une u MLA, uba la ïathuh ba hadien ba la lait na ka jingwit baroh, ka Sorkar ka la phah ha ka IIT Guwahati ban peit bniah ïa kane ka jingtei bad ban ai ka kaiphod.
Katkum ka kaiphod la ong ba ki païa kiba la pynïeng mynta la bun snem ki dang biang bad ym donkam ban pynpra ynda la bteng ban pyntrei biang ïa kane ka projek.
La ong ba kane ka projek kan dei hi jong ka JHADC hapoh ka jingpeit jingkhmih jong ka.
