Shillong, K’lyngkot 03
Ka Delimitation Committee jong ka Khasi Hills Autonomous District Council (KHADC) ka la pynkhreh ban pynlong noh tang kawei ka konstitwensi ïa ka Laitum-khrah-Malki bad ka Laban, katba ïa ka Mawprem la pynkhreh ban pynrung noh sha Jaïaw konstitwensi.
Kane ka jingpynkhreh ka dei namar ka Laban-Mawprem konstitwensi ka la duna briew palat lada ïanujor bad kiwei ki konstitwensi. Kumta ka Delimitation Committee kan pynlong noh tang kawei ka konstitwensi ïa kine ar tylli ki konstitwensi ha ka ilekshon MDC.
Shuh shuh ka delimitation committee ka la ïoh ruh ka jingai jingmut na ki ‘riew rangbah ba ka Malki-Laitumkhrah ka la jngai palat shaduh ki thaiñ New Shillong hynrei lada kynthuplang noh ïa ka Laban kaba don markhap kan dang jan bad pynsuk ïa u MDC ban leit ïakynduh ïa ki paidbah.
Haba ïoh ban ïakren bad u Chairman ka Delimitation Committee Dr. S. Kharsyiemlieh, u la ïathuh ba ka jingsngap ïa ka sur jong ki paidbah haba pynbeit thymmai ïa ki konstitwensi ka la kut ha u bnai Nohprah 2023, bad mynta yn shim rai kumno ban pynrung ïa kiwei ki shnong sha kiwei pat khnang ban long ryntih ka jingdon ki nongthep vote.
Nalor nangta u la ïathuh ba ka committee kan pyndep kloi ban pynbeit thymmai ïa ki konstitwensi khnang ba ki kam pynroi kin poi ryntih sha ki shnong ba ka Executive Committee kan ïoh ban shong pyrkhat ban mynjur ïa ka jingphiah ïa ki konstitwensi.
Haba kylli kum kiei ki shnong ki ban nym hap shuh sha Mawlai konstitwensi, u Dr. Kharsyiemlieh u la ong ba shen kin sa pyntip namar kane ka konstitwensi ka la heh palat haba ïanujor bad kiwei ki konstitwensi.
La ïoh jingtip ba ka jingslem ban pynlong ïa ka ilekshon ka lah ban dei ba ka sorkar jylla kan hap ban ap ïa ka jingmynjur ban phiah konstitwensi. Shuh shuh ka delimitation committee kan pynbeit ruh ïa ki shnong kiba hap ha kawei ka district kaba ki thep vote ha ka ilekshon MDC ha ki konstitwensi kiba hap ha kiwei ki district khnang ban suk haba pynïaid ïa ki skhim ha ki shnong ki thaw.
