Khliehriat, K’Lyngkot 03
Ka jingjia kaba la jia ha Ri Lum Jaiñtia ka la sei ïa ka jingïakylli na uba bun ba lang ba hato ki ‘riew kynthei ki long shngaiñ ha la ri ha la shnong?
Ka jingkylli ka la mih dei hadien ba kawei ka longkmie kaba la tip kum ka Kong Lita Ryngkhlem ka la jah na la ïing bad tang hapoh khyndiat sngi la lap noh ïa ka metïap jong ka.
Katei ka longkmie kaba dei na Wapung Shnong bad ka la mih na la ïing ban leit shim dawai na ka shnong Mookhep ha ka 25 tarik Nohprah mynshem snem, hynrei kam shym la wanphai shuh sha la ïing bad ki bahaïing ki la pynlong ka jingwad ïa ka.
Pynban ka la kylla long ka jingkthang mynsiem ïa ki bahaïing namar ha ka step 31 tarik Nohprah la lap noh ïa ka met kaba sah jong ka ha kawei ka jaka kyndong ha Mookhep.
Halor kane ka jingshah pynïap ka longkmie, la suba ba u Monkiru Shyrmang, 29 snem, uba na ka shnong Pamrapaithlu, u la donkti.
Ha ka jingïakren bad ki heh pulit jong ka East Jaiñtia Hills, la ïathuh ba u Monkiru u la phla ba u la leh ïa katei ka kam bymman shwa ban dkhat jubor ïa ka mynsiem jong ka.
Shuh shuh ki heh pulit ki la ïathuh ba utei u Monkiru u dei uba dang shu ïoh jamin dang lai bnai mynta hadien ba u la shah kem ha u bnai Ïaïong 2023 halor ka jingkynnoh ba u la bat bor ïa kawei ka kynthei.
Ha kawei pat ka liang ki bahaïing hasem ki la dawa na ki bor jong ka aiñ ba kan pynshitom da kaba tyngeh ïa u Monkiru ïa uba la kynnoh ba u la donkti ban pynïap dusmon ïa ka Kong Lita.
“Ngi pynrem jur ïa ka jingleh jong une u ‘riew bymman bad ngi kyrpad ïa ka aiñ ba kan pynshitom ïa u da kaba tyngeh,” la ong u Bah Chelang Ryngkhlem.
U la ïathuh ba ka Kong Lita ka don 4 ngut ki khun; uwei u shynrang bad lai ngut ki kynthei. U la ïathuh ba ha ka 25 tarik Nohprah, 2023 ka la mih na ïing ban leit shim dawai na Mookhep bad dei naduh katei ka sngi ka khlem wan phai ïing shuh.
Kumta ki bahaïing ki la pynlong ka jingwad bad hadien ki la pyntip sha ki bor shnong bad dei ha ka step jong ka 31 tarik Nohprah la lap ïa ka met ba sah jong ka Kong Lita ha kawei ka jaka kyndong ha Mookhep.
