Shillong, K’lyngkot 03
U Myntri Sorkar uba dei ruh u nongaiktien ka Sorkar MDA, u Bah Paul Lyngdoh u la ong ba ki paidbah ki tip bad sngew -thuh bha kiei ki jingshi-tom kiba pynlong ban buh jingeh ïa ka Mawmluh Cherra Cements Limited (MCCL), bad ym ïahap satia halor ka jingkynnoh ka Hynñiewtrep National Liberation Council (HNLC) tang ïa u MLA ka Sohra u Bah Gavin M Mylliem.
Haba kren shaphang ka jingbyrngem ka HNLC ïa ka jingim u MLA ka Sohra bad phah shim jingkitkhlieh tang ïa u halor ka jingtroiñ noh ka MCCL, u Bah Paul u la ong ba ka HNLC ka dei ban kiar na kaba pynmih kum kine ki jingbyrngem bad ki paidbah ki long kiba stad bad ki sngewthuh kham bha kiei ki jingpang kiba buh jingeh ïa ka MCCL.
“Phim lah ban shu khot ban pyrta kumto bad lada ka long ha kano kano ka bynta, ki paidbah ki stad bad sngewthuh kham bha kiei ki jingpang kiba buh jingeh ïa ka MCCL. Ym dei tang marwei briew, hynrei ka dei ki jingjia baroh kiba la jia ha kaba u MLA ka Sohra ruh u la pynshai,” la ong u Bah Paul.
U Bah Paul u la ong ba um kwah ban kynthoh eiei haba ïadei bad ka rukom pyni ka HNLC ïa nongrim bad jinglong khor khamtam haba ka dang don ka lynti ban ïakren ïasuk ha kaba la pynïaid baroh shikatta lyngba ka tnat Korbar Jylla. U la ong ba kino kino ki jingkren jingkynthoh kim dei ban ktah ïa ka lynti ban ïakren ïasuk.
Hynrei ha kane kajuh ka sngi, ka HNLC ka la pynbna ba ka la weng noh ïa ka jingmynjur ban ïakren ïasuk bad ka Sorkar da kaba kynnoh ba ka Sorkar Jylla bad Sorkar Pdeng kim lah ban mynjur ïa ki mat jingdawa khamtam ban pyllait lynti ïa ki nongïalam ka HNLC bad ki dkhot jong ka ban nym shah teh shah khun ha ki kyndon aiñ hynrei ban map lut ïa baroh ki jingleh beaiñ kiba la leh baroh shikatta haba ki wan sha ka jingïakren ïasuk.
