Bam duh ka ding ïa ka ïing ha Rangblang Sohsyniang, julor kumba T.2 lak eiei
Mawkyrwat, K’Lyngkot 04
Ka ding kaba klang bha ka la ïoh ban bam duh noh ïa kawei ka ïing tap tin kaba don ha ka shnong Rangblang Sohsyniang kaba hap ha South West Khasi Hills District.
Katkum ka jingtip kaba la ïoh lum la ong ba kane ka jingjia ka la jia ha ka step jong ka 4 tarik u Kyllalyngkot 2024 kata ha ka por kumba 1 baje eiei shiteng synñia.
Kane ka ïing kaba la shah bam duh ha ka ding, ka dei jong ka Kong Marylinda Thyrniang, 39 snem ka rta kaba la don 4 ngut ki khun.
Shuh shuh katkum ki tyllong khubor ba la ïohlum la ïathuh ha katei ka por jong ka jingkem ding ka ïing, ka Kong Marylinda Thyrniang lem bad ki khun kim shym la don ha ïing hynrei ki la leit ban sah kai sha ïing ka Meiieid. Dei tad haduh ka por mynstep ba la bna ïa katei ka jingjia lyngba ka jingpyntip ki paramarjan.
Shuh shuh ki tyllong khubor ki la ïathuh ruh ba ha katei ka jingjia ki nongshong shnong ki la mih paidbah ban tem ïa ka ding hynrei na ka daw jong ka jingheh palat jong ka ding kim shym lah ban pynlip ïa ka.
Ha katei ka jingjia ym shym la don kano kano ka jingjia ba sngewsih. Katkum ka jingïathuh jong ka Kong Marylinda Thyrniang, la ong ba baroh ki jingdon jingem, ki tiar ki tar ki la shah bam duh lut ha ka ding kaba la kot sha T.2 lak eiei bad ïa ka jingpluh jong katei ka ïing haduh mynta ym shym pat lah ban tip ïa ka daw tynrai.
