Shillong, K’Lyngkot 04
Nalor ka jingjyllei ka jingkhaïi be-aiñ ïa ki masi, ka jingkhaïi tuh ïa ka shini sha Bangladesh lyngba ki jaka khappud na Meghalaya ka la kiew.
Katkum ki jingkheiñ jingdiah ba la ai da ki BSF ha ka Sngi Palei, la ong ba ha u snem 2023, ka shini ba la kurup na kiba thmu ban khaïi sha Bangladesh na Meghalaya ka la kot shaduh ka 9,818 Quintal katba ha u snem 2022, ka jingïoh kurup ïa ka shini ka long tang 915 Quintal.
Ha kaba ïadei bad ki masi/muid ba la kurup, ki BSF ki la ong ba ha u snem ba la lah, ki la don 3,550 tylli ki masi/muid katba ha u snem 2022 ki la don 3,339 tylli.
Ka jingïoh kurup ïa ka dawai jyrhoh Phensedyl ha u snem 2023 ka la kot sha ka 4,989 bilor katba ha u snem 2022 ka la long haduh 7,536 bilor.
Nalorkata, ka jingïoh kurup ïa u Ganja ha u snem 2023 ka la kot sha ka 9.8 kilo katba ha u snem 2022 ka la long haduh 16.18 kilo.
Haba la kheiñ kyllum, ka jingshongdor ki mar ki mata ba la kurup ha u snem 2023 da ki BSF na khappud ha Meghalaya ka la kot sha ka T. 49.20 klur.
Ki BSF Meghalaya Frontier ki pahara ïa u khappud bad ka Bangladesh uba jrong haduh 444 km.
Nalor ki mar ki mata, ki BSF ki la kem ruh ïa 180 ngut ki runar ba kynthup ïa 113 ngut ki nong India, 67 ngut ki nong Bangladesh bad 2 ngut ki Rohingya.
Ha kajuh ka por, ki shipai BSF ki la pynlong ïa kiba bun ki prokram na ka bynta ka jingmyntoi jong ki paidbah kiba shong ba sah ha khappud.
