Delhi, K’Lyngkot 04
Ha ka jingïaroh kaba kham ñiar, ka Global Times, ka kynhun pathai khubor ba pawkhmat jong ka Beijing, China, ka la pynmih ïa kawei ka article ne jingthoh kaba ïaroh ïa ki sienjam ba ïadei bad ka jingkiew ka ïoh ka kot, ka jingpynïaid ïa ka imlang sahlang bad ka jingïadei bad kiwei kiwei ki ri hapoh ka jingïalam jong u Myntri Rangbahduh u Narendra Modi.
Ïa kane ka article la thoh da u Zhang Jiadong, Director jong ka Center for South Asian Studies ha Fudan University, Shanghai, uba la kdew ïa ki jingjop bakhraw jong ka India ha ki saw snem ba la leit. Ka la mynjur ruh ïa ka jingkiew ka India ha ka ïoh ka kot, ka jingkiew ha ka jingpynïaid ïa ki jaka sor bad ka jingkylla ha ki jingïadei bad kiwei kiwei ki ri, khamtam bad ka China. “Kum ka nuksa, haba ïakren ïa ka jingbym ryntih ka khaïi pateng hapdeng ka India bad China, ki dkhot jong ka India mynshuwa ki ju phaikhmat halor ki sienjam jong ka China ban pynduna ka jingbym ryntih ha ka khaïi pateng. Hynrei mynta ki la kham phaikhmat sha ki lad shalan mar ka India,” la thoh une u nongthoh.
Kane ka article ka la ïaroh ïa ki rukom treikam ka India ban kyntiew ïa ka “khana shaphang ka Bharat,” kaba ban jur ïa ka jingskhem jingmut jong ka ri. U nongthoh u la ong ba lyngba ka jingkiew sted ka ïoh ka kot jong ka bad ka jingkiew ha ka imlang sahlang, ka India ka la long kaba skhem jingmut bad kaba trei na ka bynta ka jingpyni ïa ka ‘khana jong ka Bharat’. “Ha ki bynta ba ïadei bad ki kam saiñ pyrthei bad ka deiriti, ka India ka la phai na ka jingban jur halor ka jingpynïahap ïa ka synshar paidbah bad ka thaiñ sepngi sha ka jingpyni ïa ka ‘jinglong ka India’ ha ki kam saiñ pyrthei ha ka synshar paidbah. Mynta ka don ka jingban jur halor ki nongrim ka India ha kaba ïadei bad ki kam saiñ pyrthei ha ka synshar paidbah,” u la bynrap.
U nongthoh u la ong ba kane ka jingkylla, ka pyni ïa ka thong jong ka India ban lait na ka syrngiew jong ka jingsynshar ki mynder ha ki por ba mynshuwa bad buh ïalade ha ka kyrdan kum ka nongwanrah jingkylla ha ka pyrthei ha ki kam saiñ pyrthei bad ha ki kam ba ïadei bad ka deiriti.
Shuh shuh, ha kane ka article la ïaroh ïa ka jingïadei jong ka India bad kiwei kiwei ki ri hapoh ka jingïalam u Myntri Rangbahduh u Modi, kaba pyni ïa ka rukom treikam jong ka ri bad ka jingkyntiew ïa ki jingïadei bad kiwei kiwei ki ri ba heh kum ka US, Japan bad Russia katba ka pyni ïa la ka nongrim jong ka ha ka jingïakynad hapdeng ka Russia bad Ukraine.
Ha kane ka article la kdew ba ka rukom pyrkhat ka India ha ka jingïadei bad kiwei kiwei ki ri ka la wanrah da kawei ka jingkylla bad ka paw shai ba ka jam sha ka rukom treikam ba khraw. “Naduh ba u Myntri Rangbahduh u Narendra Modi u la wan ha ka bor, u la trei na ka bynta ka jingïadei bad kiwei kiwei, u la kyntiew ïa ki jingïadei jong ka India bad ka US, Japan bad Russia bad kiwei kiwei ki ri bad ki kynhun ha ka thaiñ,” la ong u Professor Zhang.
Ha ka article la kdew ba ka India ka ju shim ïalade kum ka bor ha ka pyrthei. Hynrei, tang 10 snem duna naduh ba ka India ka la kynriah na ka jingpynïahap bad kiwei kiwei ki ri sha ka jingïadei bad kiwei kiwei ki ri, bad mynta ka la kylla sted sha ka rukom treikam ban long ka nongrim jong ka pyrthei kaba bun bynta.
Ha kaba kut, u nongthoh u la ong “ka paw ba ka jingkylla, ka jingkhlaiñ bad ka India kaba kham khlaiñ bad kaba don bynta ha ki kam geopolitics kaba kiwei kiwei ki ri ki hap ban pyrkhat bha.”
Kane ka jingmynjur kaba kham ñiar jong ka jingkiew ka India bad ka jingthmu jong u Myntri Rangbahduh u Modi da ka Global Times ka pyni ïa ka jingkiew ka jingithuh ïa ka bor kaba dang kiew jong ka India bad ki jingseisoh jong ka jingïadei jong ka India ha kaba ïadei bad kiwei kiwei ki ri.
