Shillong K’lyngkot 04
Ki nongïalam ka BJP ha Meghalaya ha ka sngi palei ki la ïaroh bha ïa ka Sorkar Pdeng bad ïa ki skhim bapher bapher kiba pyntreikam ha kine 9 snem tam ba synshar ka BJP tangba ki kham jngan ban jubab halor ka jingkhate ïa ka bhah ïa bei pisa ïa ki skhim hapdeng ka Sorkar Pdeng bad ka Sorkar Jylla.
Ki don bun tylli ki skhim ka Sorkar Pdeng ha kaba ka bhah ïa bei pisa (funding pattern) hapdeng ka Sorkar Pdeng bad ka Sorkar Jylla ka long 90:10, hynrei mynta ki bun ki skhim ka Sorkar Pdeng kiba ka bhah ïa bei pisa ki la kylla namar ki don ki skhim ka Sorkar Pdeng kiba kam bei pisa shuh 90:10.
Ki don ki skhim kiba ka bhah ïa bei pisa ka long mar shiliang (50:50) kum ki projek Smart City bad ka MGNREGA ka bhah ïa bei pisa na ka bynta ban thied tiar ban pyntrei ïa ki projek ka long 75:25, kaba mut ka Sorkar Pdeng ka ai 75 na ka 100 bad ka Sorkar Jylla ka hap ban ai 25 na ka 100, katba mynshwa pat ka bhah ïa bei pisa ka long beit 90 na ka Sorkar Pdeng bad 10 ka bei ka Sorkar Jylla.
Ha ka jingïakynduh bad ki lad pathai khubor, u nongïalam ka BJP uba peit ïa ka Meghalaya u Chuba Ao u la ong ba ha kine ki 9 snem tam ba synshar ka Sorkar MDA hapoh ka jingïalam u Narendra Modi kum u Myntri Rangbahduh ka ri shibun ki skhim bad jingmyntoi ki la poi sha ki paidbah bad ki dang don ruh ki nongshong shnong kiba dei hok ban ïoh jingmyntoi ki khlem pat ïoh satia.
Kumta u la ong ba ka jingïalap “Sankalp Viksit Bharat” la nang pynsngewthuh paidbah lyngba kiba bun ki jingïalap khnang ban ïathuh ïa ki skhim kiba pyntreikam bad ruh ban poi sha kito ki briew kiba khlem pat ïoh jingmyntoi khnang ban ai jingtip kaba shai bad pynsngewthuh ïa ki shaphang ki skhim ka Sorkar Pdeng bad ki lad jingmyntoi.
Haba kylli balei ka BJP Meghalaya kam pynsngew ei ei sha ka Sorkar Pdeng namar ki Jylla barit kum ka Meghalaya ki shah ktah lada pynkylla ïa ka bhah ïa bei pisa kum ïa ka MGNREGS bad kiwei kiwei ki skhim ka Sorkar Pdeng, u Chuba Ao u khlem kren bun ktien eh bad u la shu ong ngin sa peit ïa kane.
U Ao u la ong ruh ba kan long ka jingsarong ba u Modi shen un lehburom ïa u President ka BJP na Meghalaya.
Na ka liang u nongïalam ka BJP u Gagan Jaiñ u la ong ba ka Sorkar Pdeng ka ju long kaba sngap haba pynsngew ïa ki jingeh bad u la ong ba ïa kane mat yn sa rah ban pynsngew sha ki nongïalam ha Delhi.
Ka bhah ïa bei pisa na ka bynta ka MGNREGS ban thied tiar thied tar ka la nang hiar ban pyntrei ïa ki projek ka long 75:25 ym shuh kumba long mynshwa 90:10.
Sa kawei ka jingeh ban pyntreikam ïa ki skhim ka dei ka jingong ban pynïasoh beit ïa u Aadhaar kumba long ka MGNREGS.
Mynta kiba bun ki nongtrei bylla hapoh ka skhim MGNREGS kim pat don Aadhaar bad kim pat pynïasoh ïa u Aadhaar bad ka jaka kynshew pisa.
Ha kine ki khyndiat sngi, wat u Myntri ka tnat kam pynroi ka Sorkar Pdeng, u Giriraj Singh u la ong ba dei ban pynïasoh Aadhaar beit bad u la ong teng ruh ba ka por ka la dei ban nang pynhiar shuh shuh ïa ka bhah ïa bei pisa (funding pattern) hapdeng ka Sorkar Pdeng bad ka Sorkar Jylla na ka bynta ban siew ïa ka bainong jong kiba trei hapoh ka skhim bylla 100 sngi.
U Singh u la ai jingmut teng ba donkam ban pyntreikam ïa ka bhah ïa bei pisa kaba long 60:40; kamut 60 na ka Sorkar Pdeng bad ka Sorkar Jylla ka hap ban bei 40 percent ïa ka bainong.
