New Delhi K’Lyngkot 04 (UNI)
Ka seng Congress ha ka Sngi Palei ka la pyllait paidbah ïa ki jaka ba u nongïalam ka seng, u Rahul Gandhi, un ïaid ha ki 66 sngi ka ban sdang na Imphal ha Manipur bad ka ban kut ha Mumbai ha Maharashtra.
Kane ka jingïaid lynti jong u Rahul ka dei kaba la ai kyrteng ‘Bharat Jodo Nyay Yatra’ ka ban sdang ha ka 14 tarik Kyllalyngkot.
Katkum ka ‘map’ ba la pyllait da u General Secretary ka Congress, u Jairam Ramesh, kane ka jingïaid lynti u Rahul kan long lyngba ki 15 tylli ki jylla bad ka jingjrong kan long haduh 6,700 km.
Napdeng kine ki 15 tylli ki jylla, ka Meghalaya ruh ka paw kyrteng. Hynrei ka lynti ïaid ha Meghalaya kan long tang 5 km na ka bynta shi sngi ha kawei ka distrik. Na baroh ki 15 tylli ki jylla, dei tang ha Meghalaya ba ka lynti ïaid kan long kaba lyngkot tam lada peit katkum ka ‘map’ ba la pyllait da ka seng Congress.
Haba kren sha ki lad pathai khubor, u Ramesh u la ong ba la pynkylla ïa ka kyrteng jong ka Bharat Jodo Yatra sha ka Bharat Jodo Nyay Yatra. Lah ban kdew ba ha u snem 2022, u Rahul u la sdang ïa ka Bharat Jodo Yatra na Kanyakumari sha Kashmir.
U Ramesh u la ong ba ïa ka lynti jong ka jingïaid jong u Rahul naduh ka 14 tarik Kyllalyngkot la rai ha ka jingïalang ba la pynlong da u President ka Congress, u Mallikarjun Kharge.
U la ong ba ka jingïaid lynti kan long lyngba ki 15 tylli ki jylla ba kynthup ïa ka Arunachal Pradesh. Ka jingkynthup ïa ka Arunachal Pradesh ha ka jingïaid lynti ka long hadien ba ka Congress ka la shah thalaiñ tyngeh ha ka BJP namar ha ka banyngkong ka kyrteng jong ka Arunachal Pradesh kam shym la don satia.
Ha kane ka kynti, u Ramesh u la ong ba u Rahul un ïaid ha Arunachal Pradesh na ka bynta 44 km bad un sah shi sngi ha kane ka jylla.
Ha ki 66 sngi jong ka jingïaid lynti ba 6,700 km, u Rahul un ïaid lyngba ki 110 tylli ki konstitwensi Lok Sabha. Hynrei ha kane ka kynti, u Rahul un kham shong da ka bos watla kan don ruh ka jingïaid kjat kaba katto katne por.
U Ramesh u la ong ba ki seng kiba don ha ka kynhun synrop INDIA ki lah ban ïashim bynta lang ha kane ka jingïaid lynti.
Ïai leh kyllut ka Municipal ïa ki jingjaboh bad ki jingsniew kiba paw pyrthei
