Shillong, K’lyngkot 04
U pulit ophisar barim ka Jylla uba dei mynta u nongïalam ka BJP, u Bah M Kharkrang u la ong ba ka long kaba lyngngoh ba ka HNLC ka weng noh na ka jingkren ïasuk.
“Ngi kwah jingsuk, hynrei lyngngoh pat ba ka HNLC ka weng noh na ka jingïakren ïasuk,” la pynpaw u Bah Kharkrang haba kylli kaei ka jingsngew jong u kum u pulit ophisar barim.
Haba kylli halor ka jingbuh kyndon ka HNLC ban map ne weng noh ïa baroh ki jingmudui ïa ki nongïalam ka HNLC haba ki wan sha ka jingïakren ïasuk, u Bah Kharkrang u la ong, “Kam dei kaba suk ïa ka Sorkar ban shu weng noh mar-mar. Lada ki don lei lei ki case kiba la dep ban pynngat ha ki jingkynnoh (chargesheet) bad ïaid ka jingbishar ha ka Ïingbishar kam long kaba suk ïa ka Sorkar ban leh.”
U Bah Kharkrang u la ong ruh ba lada map ïa kawei ka liang, kaei pat ka hok na ka bynta ki briew kiba la shah leh mynshwa namarba lada pyllait shiliang, kawei pat ka liang ka shah ktah.
U la ong ba ka HNLC ka shu long kyrkieh ban rai ban weng noh na ka jingïakren, bad u kyntu ba kin wan sha ka miej bad bteng ïa ka jingïakren namarba ha kano kano ka jingïakren pynbeit, ka don beit ka jingai bad jingshim markylliang bad ka HNLC ruh ka dei ban peit kham ïar na ka bynta ka jingmyntoi ki paidbah.
U Bah Kharkrang u la ong ruh lada ka Sorkar ka la mynjur ban ai kata ka lynti kaba kylluid ba kin wan (safe passage), kan dei beit ka jingailad ban wan bad kan nym don kano kano ka jingartatien.
Halor ka jingbyrngem ban shim ïa ka jingim u MLA ka Sohra, u Bah Kharkrang u la ong ba ka long kaei kaei ka bym dei rukom namar ka jingpang kaba la ktah la bun phew snem ïa ka MCCL ym lah ban shu kynnoh tang ïa marwei briew.
