Shillong, K’lyngkot 04
U MLA ka VPP na Mawlai konstitwensi u Bah Brightstarwell Marbaniang u la pynthikna ba un nym ïakhun shuh ïa ka ilekshon MDC namar u la shah jied kum u MLA hynrei un ailad ïa kiwei pat ban ïakhun.
Nalor nangta u Bah Brightstarwell u la ïathuh ba ki la don 7 ngut kiba la pan tiket ïa ka ilekshon MDC na ka seng VPP na Mawlai konstitwensi hynrei ban rai ïa u kyrtong yn sa shim ka Election Committee jong ka VPP.
Haba ïakren kyrpang bad u Bah Brightstarwell hadien ba la kut ka jingkhap ribon ïa ka madan futsal ha Mawlai Lumpyngrope, u la ïathuh ba nalor ki hynñiew ngut ki nongkitkam ka VPP kiba pan tiket ïa ka ilekshon MDC, ki don ruh ki ‘riew rangbah kiba nabar ka seng VPP ki la pan tiket. Na ka liang ka jylli ka la phah lang ïa ka shithi jong ki sha ka Election Committee bad ka Election Committee kan sa phah pat sha ka State Executive Committee.
Haba kylli balei phim treh shuh ban ïakhun ïa ka ilekshon MDC, u la pynpaw ba ka seng kam kwah shuh ïa ki MLA ba kin ïakhun ïa ka ilekshon MDC namar ka seng ka kwah ba uwei u briew kawei ka shuki.
Namar kata, u don jingkyrmen ba ki paidbah kin ai jingkyrshan ïa u kyrtong ka VPP ha Mawlai konstitwensi ha ka ilekshon MDC kumba ki la ai jingkyrshan ïa ka ilekshon MLA.
U Bah Brightstarwell um pat kwah ban ai jingkynthoh ïa ka jingaiksai ka sorkar ban nym pynlong ïa ka ilekshon MDC namar u don jingkyrmen ba kan long beit ha u bnai Rymphang mynta u snem haba ka samoi treikam jong ki MDC ka KHADC ka la kut, hynrei ynda ka sorkar kam treh ban pynlong ïa ka ilekshon un sa peit hangta.
Haba kylli halor ka ilekshon MP Lok Sabha, u Bah Brightstarwell u la ong ba ka rai baroh ka shong beit ha ki paidbah hadien ba ka UDP bad ka NPP ki la dep ban pynbna ïa ki kyrtong.
U la ïathuh namar ha kine ki bnai haba u leit jingïalang sha kiwei ki konstitwensi u don jingkyrmen ba ki paidbah kin jied ïa u kyrtong ka VPP namar ka dei ka seng kaba don ïa ka nongrim.
