Nongstoiñ, K’Lyngkot 04
Wat la ki la don ha ki kyrdan pule bapher bapher bad bud sa ka jingshah kren ha ki babun balang, pynban ka jinglehraiñ kam shym la lah ban khanglad ïa ki ar ngut shipara kiba don ka mon ban trei ïa ki kam ki jam la ka long ha ki kam barit baria wat ban hap ban shong bad ban trei harud surok tang ban im ja bad kamai jakpoh. Kane ka dei na ka mynsiem len lade ban sdang ïeng ha la ki jong ki kjat khlem da ap ïano-ïano ban ïarap.
Kine ar ngut shipara ki long u Telesphor Dkhar bad u Justin Dkhar na ka shnong Nongsohpian, hynrei kiba shong ba sah mynta ha shnong Tiehsaw, Nongstoiñ ha West Khasi Hills.
U samla Telesphor Dkhar u dei uba la pyndep ïa ka BSC Micro-biology bad u Justin Dkhar u la pyndep ïa ka BA. Namar ka jingbym ïoh kam, kumta tang ban im jakpoh kine ki samla ki la im sngi mynta ban syang doh (Barbecue) ha kawei na ki jaka harud ka surok bah Nongstoiñ-Shillong ha ka jaka kaba dang hap hapoh ka shnong Nongsohpian, West Khasi Hills.
Nalor nangta la ïathuh ruh ba kitei shipara ki la sdang ïa katei ka kam dang mynta katto katne bnai. Ki lap ba katei ka kam syang doh ruh ka dei kawei na ki kam ba biang.
U samla Telesphor u la pynpaw ruh da kaba ïathuh ba bun ki kam bylla u la trei, bad ki kam kiba bun hynrei ka dei tang ka jingjaituh namar ba kwah tang ïa ki kam kiba suk bad kawei ruh ka dei ka jinglehraiñ.
“Hooid ngi ruh ha kaba sdang ïa kane ka kam, ngi lehraiñ namar haba ki briew ki ïohi ki rkhie, don pat kiba beiñ bad don ruh kiba ai mynsiem hynrei slem slem mynta ka biang la ka biang,” la ong u samla Telesphor.
U la ong ruh “Nga ai mynsiem ïa ki para samla ba bun ki kam bylla lada phi ïa smat ïa sting, lada nang ban pyrkhat ban wad ïa ki lad ki lynti bad ngi ruh ïa kane ka kam bylla ngim poi pyrkhat hynrei mynta pat ngi lap ba ka long shisha kaba pynim ïa ngi lada ngi trei shitom.”
Kumta u la kyntu ba kin long kiba smat ba sting, wat nym lehraiñ hynrei trei hok ïa kano kano ka kam kaba trei la ka long ka kam kaba rit hynrei leshe kaba lah pat ban kyrshan la ha kano kano ka liang.
U samla Telesphor u la ïathuh ruh ba haba ki ïeng ha katei ka jaka ban syang doh, kiba bun ki briew kiba kwah ban bam ki wan ban thied kata naduh ki nongwan jngoh kai kiba ïaid lyngba katei ka surok. Na ka liang jong u, u la kyntu ïa ki paidbah kiba ïaid ba ïeng lyngba katei ka jaka ba kin hiar ban thied lem, ha kaba u la ong ba kin pyrshang ban ïaleh katba lah ban kham pynbang ïa ka doh bad kin pyrshang ruh ban leh khuid katba lah khnang ba ki nongwan thied kin nang sngewtynnad.
U la kyntu ruh ïa ki paidbah kiba wan thied doh ban bam, ynda ki la dep ym dei ban bret pathar sha ki rud surok namar ka pynjaboh bad pynisih ïa ka mariang.
