Shillong, K’lyngkot 04
Ka BJP kaba la buhthong ban ïoh palat 400 ngut ki MP ha kane ka ilekshon ban sa wan, bad ka la ong ba kan nym don satia ka jingïabhah konstitwensi ban ïakhun ïa ka ilekshon Lok Sabha ha Meghalaya bad na ka liang ka seng kan trei shitom bad sei da ki kyrtong kiba biang tam ban ïakhun.
Ïa kane la ïathuh da u nongïalam ka BJP uba peit ïa ka Jylla Meghalaya u Chuba Ao haba kren sha ki lad pathai khubor.
U la ong ba haduh mynta ym pat don kyrteng kiba dei ban long ki kyrtong bad ynda la dei ka por yn sa jied da kiba biang tam ban ïakhun na Shillong bad Tura.
Haba kylli la ka BJP ka lah ban buh da ki kynthei na baroh ar tylli ki konstitwensi u la ong ba ym pat lah ban ong ei ei ïa mynta tad haduh ban da tip ïa ki briew kiba pan tiket ban ïakhun ïa ka ilekshon.
U la ong ba ki don ki konstitwensi kiba ka BJP ka tlot bad ki don kiba ka khlaiñ hynrei ha ki konstitwensi kiba tlot yn trei shitom ban leit sha kylleng ki jaka ban pynshai da kaba pynïar ïa ka ïing bad nang pynkiew ka jingkhlaiñ.
U la ong ba kito kiba ïakhun ïa ka ilekshon MLA ha ki jylla bapher bapher, dei ban khot ïa ki ba kin nang pynkhlaiñ lang ïa ka seng da kaba leit rung kylleng ki jaka.
Haba kylli halor ka jingweng noh ka HNLC na ka jingïakren ïasuk bad ka Sorkar, u President ka BJP u Rikman Momin u la ong kum ki briew bad kum ka seng, “ngi kwah ïa ka suk ka saiñ bad dei ban don ka jingïakren ïasuk bad ka Sorkar.”
Hynrei u khlem nud ban kren than halor ka jingweng ka HNLC na ka jingïakren bad ka Sorkar namar dang shu ïohi ha kotkhubor ba ka la don kum kata ka jingweng noh ban ïakren bad ka Sorkar.
