Shillong, K’lyngkot 04
U MLA ka VPP na Mawlai konstitwensi u Bah Brightstarwell Marbaniang u la ong ba ki nongkitkam ka VPP kim kwah ban leh kum ki khynnah ban leit kylli man ka por ïa ka sorkar jylla halor ka ‘Expert Committee’ na bynta ka bhah thungkam thungjam hynrei kumba ka sorkar jylla ka la dep thung kin ap beit haduh ba kin da dep.
U Bah Brightstarwell u la ïathuh ba ka seng VPP ka la dep ïakynduh ruh ïa u Myntri Rangbah ka jylla u Conrad K Sangma namar ka jingai por haduh shisnem ïa ka expert committee ka la slem palat namar ki kwah ba tang hapoh 6 bnai ka la biang palat.
Ha ka jingïakynduh bad u Myntri Rangbah ka jylla u Conrad Sangma, u la kubur ba ka shisnem ka la slem palat hynrei ngi la kyrpad ban ai por hapoh hynriew bnai ba kane ka committee kan aiti ïa ka kaiphot sha ka sorkar jylla.
U la ong ba lada don kiba kynthoh ka dei tang ka jinglutksan haba thaw ïa ka expert committee, ka sorkar ka la dei ban pynduh noh ban thung chairman, co-chairman kiba pynlut kai ïa ka pisa paidbah.
U la pynpaw ba ym dei tang ka VPP kaba buh ïa ka mat jingkular ha ki paidbah ha ka por ilekshon hynrei kiwei ruh ki la buh, pynban namar ka VPP kam don ha ka sorkar haba ki wanrah ban ïatai ha ïingdorbar thawaiñ ki hap ban leit pynshai sha ki paidbah.
Shuh shuh u la ong biang ba ka VPP ka kwah ba ka sorkar ka dei ban pynkylla biang ïa ka bhah thungkam thungjam bad u sngewkmen ba ka sorkar ka la thung ïa ka expert committee.
Kum ban shu pynkynmaw ïa ka jingdawa ban pynbeit thymmai ïa ka bhah thungkam thungjam da ka seng VPP kaba u Bah Ardent Basaïawmoit kum u President u la shong shah thngan hajan ka jaka ïeng kali ha Additional Secretariat. Kumta na ka liang ka sorkar ka la kular ban thaw da ka expert committee ban bishar bniah halor ka jingdawa ka VPP ban pynbeit thymmai da kaba peit ïa ka jingbun briew namar u Khasi bad Jaiñtia u la kham bun briew ban ïa u Garo.
