Shillong, K’Lyngkot 04
Katkum ka khubor na ki pulit, u Siddhart Banerjee jong ka Star Cement, Lumshnong, u la ujor ba ha ka 12 tarik Nohprah, 2023, ha ka por kumba 8:30 mynstep, ki runar ki la tuh ïa ki mar ki mata na kane ka karkhana shna dewbilat bad ka jingshongdor jong ki mar ba la shah tuh ki long palat T. 1 klur.
Ki mar ki mata kiba la shah tuh noh ki kynthup ïa 3,000 tylli ki ‘bolt’ bad ‘nut’, 36 tylli ki ‘insert plate’, 112 tylli ki ‘Drill Assembly’, bad 222 tylli ki ‘Slotted Assembly’. Kine ki tiar ki dei kiba pyndonkam ha ki kor ki bor ban shna dewbilat bad la tuh ïa ki na ka jaka buh tiar kaba don ha kane ka karkhana hi. La ong ba kine ki mar ki mata kiba la shah tuh ki shongdor haduh T. 1,88,17,808.
Ha kawei pat ka jingjia, u Arjun Joshi u la ujor ba ha ka 29 tarik Nohprah, 2023 ha ka por kumba 11:40 mynstep, u la lap ba ki runar ki la tuh ïa ki ‘battery’ ba dei jong ki kor CCTV ha Laban Cultural Club.
Sa ha kawei pat ka jingjia, u Albert Mawlong u la ujor ba ha ka 1 tarik Kyllalyngkot, 2024, ki runar ki la tuh noh ïa ka ar shaka (ML-05Z-8012) ka jong u na Nongthymmai Nongkhyriem, Shillong.
Shuh shuh ka khubor na ki pulit ka ïathuh ba u Anjelus Mawlong u la ujor ba ha ka 1 tarik Kyllalyngkot, 2024 ha ka por kumba 2 baje mynstep, ki runar ki la tuh ïa ka pisa kaba don T. 1.5 lak bad kiwei ki tiar ki tar na ka ïing sah jong u kaba don ha Umsohlang Umsning ha Ri-Bhoi.
Nalorkata, la ïathuh ba ha ka 30 tarik Nohprah, 2023 ha ka por kumba 3:40 mynstep, ki runar ki la tuh ïa kawei ka kali Maruti Eeco Van (AS-01EF-1519) kaba dei jong u Pawan Kumar Swami na Byrnihat.
Sa ha kawei pat ka jingjia, u Ashutosh Kumar Paul, uba dei u nongñiah ïa ka trok (CG-04FL-2414) u la ujor ba ha ka 29 tarik Nohprah, 2023 ha ka por kumba 3:20 mynstep, hynriew ngut ki runar ki la sei haduh 200 litre ka umphniang Diesel na ka trok jong u kaba la pynïeng ha Bhoirymbong, Ri-Bhoi.
Ha kawei pat ka jingjia, u Budlang Pohtmi u la ujor ba ha ka 28 tarik Nohprah, 2023, ki runar ki la rung sha ka ïing sah jong u ha Mawblei Madanrting Block-I, Shillong, bad ki la tuh saw tula ka ksiar.
Ha ka 28 tarik Nohprah, 2023 ha ka por kumba 2:40 mynsngi, ki BSF kiba don ha Hawaitilla BOP (West Jaiñtia) ki la ïoh kem ïa uwei u nong Bangladesh ïa uba la tip kyrteng kum u Salim Ahmed (35 snem) na kawei ka jaka kaba hap ha ka thaiñ Muktapur, bad kham hadien la lap ïa saw tylli ki byrni ba la thep da u piat na ka jaka ba long khlaw ba la thmu ban shalan tuh sha Bangladesh.
Shuh shuh sa ha kawei pat ka jingjia, u Silseng M Sangma u la ujor ba ha ka miet jong ka 29 tarik Nohprah, 2023, u la shem ba ka kali Bolero Pik-Up (ML-08C-4955) ka jong u ka la jah na Rongrak Gonganggre kaba don ha South Garo Hills.
