Khliehriat, K’Lyngkot 04
Ka Dorbar Shnong Pamrapaithlu lyngba ka kyrwoh ba pyllait da u Waheh Shnong, u Ma Leningstar Rymbai bad u Secretary Shnong Ma Lakshmon Siangshai, ka la pynshai sha ki paidbah ba u Monkiru Shyrmang um dei na ka shnong Pamrapaithlu.
Ka Dorbar Shnong kam ithuh ïa u kum u trai shnong, namar une u briew um don kawei ruh ka jingpynshisha ba u long u trai shnong jong ka shnong Pamrapaithlu, kata um don ïa ka Voter Identity Card hapoh ka Electoral Rolls, um don hapoh ka jinglum thup (Registration Record) hapoh ka bui (register) ka Dorbar Shnong kumba don ki longïing longsem bad ki nongshong shnong baroh.
Halor kane ka nongrim, ka Dorbar Shnong kam lah ban pdiang ïa ka jingkam u Monkiru Shyrmang ba u dei na ka shnong Pamrapaithlu bad ym lah hi ruh ban pdiang ba u dei u nongshong shnong namar kam long ka rukom bad kam ju don hi ruh ka synshar-khadar shnong hapoh ka Dorbar Shnong Pamrapaithlu ban pdiang shnong ïa u/ka briew khlem da don hapoh ka thup number ïing katkum ba la buh beit buh ryntih ïa ki longïing longsem baroh salonsar hapoh ka bui shnong.
“Halor kane ka jingmih kyrteng ka shnong jong ngi, ngi pynpaw ka jingpyrshah kaba jur ba kumno ka bor jong ka aiñ ka la pdiang ïa kane haba khlem da ïoh ïa ki sakhi satar ba biang ban pynshisha ba u dei na ka shnong jong ngi ka Pamrapaithlu, bad kaba sngew thamula bad pynsngewsih ïa ngi wat na ka bor jong ka aiñ ruh ki khlem kynjoh ktien sha u waheh shnong shi kyntien ruh ban pynshisha. Kane ka long ka jingpynjah burom ïa ka burom ka ijot jong ka shnong jong ngi ka Pamrapaithlu,” la ong u Ma Leningstar Rymbai.
U la ong ba ka ophis ka Dorbar Shnong Pamrapaithlu, ka la maham tyngeh ïa ki briew kiba shim kabu ban pynjah burom ïa ka shnong, lada dei na ki ophis sorkar ne nongpathai khubor ne ki seng ne ki ‘riew shimet ba nangne shakhmat kan nym dei shuh ban dang jia shuh, te lada dang jia ka Dorbar Shnong kan sa shim ki lad ki lynti pyrshah ïa ki katkum ka bor jong ka aiñ.
