Shillong, K’lyngkot 04
Ka jingpynbor ka Sorkar Pdeng ban pynïasoh beit ïa u Aadhaar bad ka jaka kynshew pisa jong ki kan buh jingeh ïa ki lak ngut ki nongtrei bylla hapoh ka skhim Mahatma Gandhi National Rural Employment Guarantee Scheme (MGNREGS) ha kane ka Jylla kiba ym pat pynrung kyrteng ban ïoh ïa u Aadhaar nombar bad ka job card bad ruh bad ka jaka kynshew pisa.
Ka Sorkar Pdeng ka la ong ba hap ban pyntreikam ïa ka Aadhaar-Based Payment System (ABPS) haba siew bainong ïa ki nongtrei bylla kiba don job card hapoh ka skhim MGNREGS.
Ha Meghalaya ki dang don ki lak ngut ki nongtrei bylla hapoh kane ka skhim 100 sngi kiba khlem don Aadhaar bad ki bym pat pynïasoh Aadhar bad ka jaka kynshew pisa (bank account).
Kaba eh mynta ka long kumno ka Sorkar Pdeng kan leh ïa kito kiba don job card tangba ki khlem pat pynïasoh ïa u Aadhaar bad ka jaka kynshew pisa jong ki ha Bank.
Naduh mynta u snem, ka Sorkar Pdeng ka la pynbna ba ka jingsiew bainong ka hap ban ïaid lyngba ka Aadhaar-Based Payment System (ABPS) hynrei lada ki nongbylla kim pat lah ban leh ïa kane, ka jingeh ka la don lypa hakhmat.
Haduh kine ki khyndiat bnai, ki dang don kiba la pynïasoh Aadhar ki long kumba 6.2 lak ngut ki nongtrei bylla ka skhim MGNREGS ha Meghalaya na ki 8.8 lak ngut kiba don kyrteng bad don job card hapoh kane ka skhim.
