Nongstoiñ, K’Lyngkot 05
Ka ophis jong u District Election Officer, West Khasi Hills District, ha ka 5 tarik u Kyllalyng-kot, 2024 ka la pynlong ïa ka prokram ha ka Conference Hall, jong ka ophis u Deputy Commissioner, West Khasi Hills District na ka bynta ban sam ïa ka ‘Final Publication of Electoral Roll’ ne ki kyrteng bad ka jingdon jong ki nongthep ‘vote’ kiba hap hapoh jong ka 32 Nongstoiñ (ST) Assembly Constituency, 33 Rambrai Jyrngam (ST) Assembly Consti-tuency bad 34 Maw-shynrut (ST) Assembly Constituency.
Ha katei ka sngi nalor ka thup kyrteng bad ka jingdon ki nongthep ‘vote’, la ïoh ruh ban sam da ki 3 ngut ki ‘Electoral Registra-tion Officer’ kiba dei khmih ïa kitei ki 3 tylli ki Assembly Constituency kiba kynthup ïa u Bah H.K. Thabah, MCS, Electoral Registration Officer, 32-Nongstoiñ (ST) Assembly Constituency, Bah V. Swer, MCS, Electoral Registration Officer, 33-Rambrai Jyrngam (ST) Assembly Constituency bad u Bah M.A Challam, MCS, Electoral Registration Officer, 34- Mawshynrut (ST) Assembly Constituency ha ka jingdonlang kiwei-kiwei ki ophisar Sorkar bad ki briew na ki seng saiñ hima bapher-bapher kiba dei na kitei ki 3 tylli ki Assembly Constituency.
Haba phai sha West Khasi Hills District, ka jingdon briew ka la kot sha 200,350 ngut bad napdeng kine, 128,021 ngut ki la bit ban long ki nongthep ‘vote’ kaba kynthup ïa ki shynrang bad kynthei, katba ka jingdon jong ki nongthep ‘vote’ kiba thymmai – kata hapdeng ka rta kaba 18 haduh 19 snem, haduh ka 5 tarik u Kyllalyngkot, 2024 ka long 4978 ngut.
Katkum katei ka thup kaba khatduh, ki 3 tylli ki Assembly Constituency ki don 193 tylli ki Polling Station, hynrei mynta, la dep ban thaw sa 3 tylli kiba thymmai na ka bynta ka 32- Nongstoiñ, kata ka long ka Pyndendiloiñ kaba hap hapoh jong ka Khliehmawlieh PS, Mawpharbah hapoh ka Jaidoh PS bad Pyndensohphoh hapoh ka Marshan Namlang PS kumjuh ruh sa 3 tylli ki ‘Section’ kiba thymmai na ka bynta ka 33- Rambrai Jyrngam la dep ban thaw kaba kynthup ïa ka Mawblang bad Umriang kiba hap hapoh jong ka Nongspung PS bad Thangkuli B hapoh ka Mawsmai PS.
Shuh shuh, ki ERO jong ka 32- Nongstoiñ (ST) Assembly Constituency, 33- Rambrai Jyrngam (ST) Assembly Constituency bad 34- Mawshynrut (ST) Assembly Constituency ki la pyntip sha ki paidbah ba ka thup na ka bynta ka ‘draft electoral roll’ jong kitei ki 3 tylli ki Assembly Constituency la leh da kaba pynshong nongrim katkum ka 1 tarik u Kyllalyngkot, 2024 kaba dei ka tarik ban pyntikna la ka rta jong ki la ki la bit ne em ban long ki nongthep ‘vote’, kumjuh katkum ka Registration of Electors Rules, 1960.
Nalor kane, la dep ruh bah buh ‘copy’ halor katei ka ‘electoral roll’ bad kiba kwah ban wan peit ki lah ban wan ha ka ophis jong ki Electoral Registration Officer, kiba don ha ka ophis u Deputy Commissioner West Khasi Hills, District.
