Shillong, K’lyngkot 05
Ka Sorkar Jylla kan sa ïakynduh ha ka taïew ban wan haba ïadei bad ka jingpynbna jong ka seng ba shah ñiew beaiñ ka Hynñiewtrep National Liberation Council (HNLC) ban weng noh na ka lynti jong ka jingïakren ïasuk bad ka Sorkar. Kane ka jingïakynduh kan long ynda la wan u Myntri Rangbah u Conrad K Sangma bad u Symbud Myntri Rangbah uba peit ïa ka tnat korbar Jylla, u Bah Prestone Tynsong.
Haba ki nongthoh khubor ki buh jingkylli, kaei ka sienjam ba ka Sorkar Jylla kan shim haba ïadei bad ka jingpynbna jong ka HNLC, u nongaiktien ka Sorkar MDA, u Bah Paul Lyngdoh u la ong ba ka Sorkar ka sngewdei ban kyntu ïa ka HNLC ban phaidien biang bad ym dei ban weng na ka lynti jong ka jingïakren ïasuk.
U Bah Paul u la ong haduh mynta ka dang dei ka jingpynbna kaba ïohi lyngba ki lad pathai khubor bad ym pat don kano-kano ka jingthoh ne ka jingai ktien tangba ka Sorkar ka la shimkhia ïa kane ka kam bad donkam ban leh noh kloi.
U Bah Paul uba dei ruh u Myntri Sorkar, u la ong ba na ka liang jong u, u sngewdei ban kyntu ïa ka HNLC ba kan nym pat weng na ka jingïakren ïasuk namarba ka jingïakren ka la ïaid teng naba sdang bad shibun kiei-kiei ki la dep.
U kyrmen ba baroh ki mamla naduh ka Sorkar Jylla, Sorkar Pdeng bad HNLC kin poi sha ka jingbeit bad ïahun lang.
Kumta u la ong ba kaba tikna ka long ba tang shu wan u Myntri Rangbah bad u Symbud Myntri Rangbah kan don noh ka jingïakynduh jong ka Sorkar namar ka jinglong jong ka kam ruh ka long kyrkieh.
Haba kylli halor ka jingdawa ka HNLC ban map ïa ki kam bymman kiba la leh da ki nongïalam ka HNLC khnang ba kin wan ïashimbynta hi da ki nongïalam ba hakhmat, u Bah Paul u la ong ba ïa kane lah ban pdiang bad peit katkum ka jinglong jong kita ki kam bymman.
Hynrei u la ong ba haba don ka jingïakren ïasuk, ka lynti kam dei ban long ba kan long ka jingtieng ïa kawei ka liang bad kan long ka jingbiang tang ïa kawei pat ka liang.
“Haba don ka jingïakren ïasuk, ka dei ban don ka jingïabiang lang baroh arliang bad kata ka dei ban long markylliang ka jingïabiang,” u la bynrap.
Kumta u la ong ba ynda la peit bniah ïa kita ki kam bymman yn sa sngewthuh bad lah ban pdiang da ka jingmynjur lang.
