Shillong, K’lyngkot:
U Rangbah Shnong ka K.O.R, u Bah G. Lyngdoh u la ong ba ïa ka ‘Shelter Home’ kaba don ha Kenches Trace la buh tang ha ka por ba wan lynshop ka khlam Covid-19 bad kum ka shnong ka la hap ban wanrah la ka wanrah ïa katei ka jaka namar ka shnong ka don ka jingpyrkhat na ka bynta ki briew ki bym don ïing don sem ha katei ka por hynrei hadien ka jingkut jong ka khlam la ïohi pynban ba ki la mih bun kiei kiei ki jingjia ha katei ka jaka.
Kum ban shu kdew hangne, na ka liang jong ka Dorbar Shnong K.O.R ka la pynpaw ba ka khlem shym la ai kano kano ka jingmynjur lane ka NOC ban buh ïa katei ka ‘Shelter Home’ hapoh katei ka shnong. Katei ka ‘Shelter Home’ ka la mih ha ka por ba wan lynshop ka khlam Covid-19 kum ka ‘Temporary Shelter Centre’ ne ka jaka shipor na ka bynta ki briew kiba bym don ïing don sem bad ki bym biang kamai kajih hynrei mynta ka la kylla long pynban da kumwei bad ka jingbym lah ki bor pynïaid ka Shillong Municipal Board(SMB) ban tehlakam ïa ki briew ba wan sah ha katei ka jaka ka la buh jingma ïa ki nongshong shnong jong ka thaiñ Kenchs Trace, Oxford, Rilbong (K.O.R) bad Laban ruh kumjuh.
Haba ïoh ban ïakren bad utei u Rangbah Shnong, u la ïathuh ba hashwa ban paw pyrthei lyngba ki video ha ki rynsan ‘Social Media’ halor ka jingdih drok ki kynthei bad shynrang ha katei ka jaka bad kaba ka la kylla long ruh kum ka ktem ïadih drok bad ka jaka ban ïaleh ïa ki kam awria, na ka liang jong ka shnong ka la dep ban phah shithi sha u Chief Executive Officer (CEO) ka Shillong Municipal Board hynrei haduh mynta mynne ym shym la leh eiei satia halor kane.
U Bah Lyngdoh u la ong ba na ka liang jing ka shnong lyngba ka shithi ba ka la phah sha u CEO ka Shillong Municipal Board ka la ong ruh ba ki dei ban wad noh da ka jaka kaba kham bha bad kaba kham biang ba kin pynkynriah ïa katei ka ‘Shelter Home’ watla ka shnong ka khlem satia beh ïa ki.
“Ngi la thoh da ka shithi sha u CEO hynrei u khlem leh eiei bad ngi la thoh ba da kumno kumno kin wad ka jaka kaba kham bha, ngim ong ba ngin beh hynrei ba kin pynkynriah bad ba kin ai noh sha kawei ka jaka kaba kham biang”, la ong u Bah Lyngdoh.
U Bah Lyngdoh u la ong ba ka shnong kam kwah ban weng noh ïa katei ka ‘Shelter Home’ hynrei kaei ba ka shnong ka kwah ka long ba ka Shillong Municipal Board kan buh noh ïa katei ka Shelter Home sha kawei ka jaka.
Shuh shuh u Bah Lyngdoh u la ong ba ïa kito ki briew kiba la paw lyngba ka video kaba saphriang um don jingithuh satia ïa ki hynrei ki dei ki briew kiba la wan hi lyngba ka Shillong Municipal Board.
“Ki briew ki dei naei ngim tip, ki wanrah ma ki te ki tip ma ki, ki briew aïu ngim ithuh, lada ki dei ki briew ki bym don ïing don sem lane ki dei ki bym biang kam biang jam, ngim lah ban ong namar ki khlem ïatreilang bad ngi ha ka por ba wanrah ruh bad ka thup kyrteng jong kito ruh ngim don, ka thup kyrteng ka don bad ki nongpeit jong katei ka jaka”, la ong u Bah Lyngdoh.
Haba kylli ba na ka liang ka shnong kan leh kumno lada na ka liang jong ka Municipal kam leh eiei halor kane, u Bah Lyngdoh u la ong ba ka shnong kan sa peit halor kata hynrei ïa mynta um pat lah ban ong eiei tad haduh ba kin da shong da ka jingïalang shnong ban shim rai halor kane.
”Ngin sa shong shwa ha ka jingïalang jong ka Dorbar Shnong bad ngin sa shim ïa ka rai kumno ban shimkhia biang ïa kajuh ka mat”, la ong u Bah Lyngdoh.
U Bah Lyngdoh u la ïathuh ba ka shnong ka la ju phah teng ïa ka shithi sha ka Municipal ha kaba ïadei bad katei ka ‘Shelter Home’ hashwa ban jia kitei ki jingjia kata naduh ki snem 2021-2022 eiei.
