New Delhi, K’Lyngkot 05
Ki ‘Commando’ Navy jong ka Ri India ha ka Sngi Thohdieng ki la ïoh ban pyllait im ïa baroh 21 ngut ki nongtrei, ba kynthup ïa 15 ngut kiba dei ki nong India, ha kawei ka jhad kaba la shah rahbor bad ïa kaba la ai kyrteng ‘MV Lila Norfolk’ hajan Somalia ha ka duriaw Arabian Sea.
Ki shipai duriaw jong ka India ki la pyndonkam da ka jhad ïapom, liengsuiñ, helicopter, Predator Mq9B Drone bad kiwei ha ka jingleit pyllait im ïa kitei ki briew kiba don ha ka jhad.
Kine ki ‘Commando’ ba la tip kum ki MARCOS, ki la leit rung sha katei ka jhad bad ki la ïoh ban pyllait ïa ki 15 ngut ki nong India. Kane ka jhad ka la don ha duriaw Arabian Sea. Hynrei na ka liang ki ‘Commando’ kiba la leit sha katei ka jhad ki la pynthikna ba kita ki nongrahbor ki khlem don satia ha katei ka jhad. Ïa kane la pyntip da u nongaiktien ki shipai duriaw ka Ri.
U nongaiktien u la ong ruh ba la lah ban pyllait ïa baroh 21 ngut ki nongtrei jong katei ka jhad ba kynthup ïa 15 ngut na India.
“Hadien ka jingpeit bniah da ki Commando MARCOS, la pynthikna ba kita ki nongrahbor ki khlem don ha katei ka jhad. Lehse ki nongrahbor ki la kynran dien noh na ka jingthmu ban rahbor ïa ka jhad hadien ba ki shipai duriaw jong ka India ki la ai da ka jingmaham ba tyngeh lyngba ka helicopter kaba la pahara,” la ong u nongaiktien.
Ïa ka jingrahbor ïa katei ka jhad la pyntip da ka UK Maritime Trade Operations (UKMTO), kaba dei ka kynhun na Bilat kaba peitngor ïa ka ïaid ka ïeng jong ki jhad ha ki duriaw.
Ka jhad ïapom jong ki shipai duriaw, ka INS Chennai, ka la phah da kawei ka Helicopter ban maham ïa ki nongrahbor ba ki dei ban mih noh na katei ka jhad kaba ki la rahbor.
