Nongstoiñ, K’Lyngkot 05
U Superintendent of Police, West Khasi Hills District, u la pyntip sha ki paidbah baroh ba ka Sarila Sangma (27 snem ka rta) kaba dei ka khun jong u Melthi Sangma, na ka shnong Songsak, kaba hap hapoh ka West Khasi Hills, District ka la jah na la ïing naduh ka 22 tarik u Nohprah 2023. Kane ka long katkum ka ejahar kaba la ujor da u kpa ka Sarila bad haduh mynta ym pat shym la lap dien ïa ka. Ka Sarila Sangma ka long kaba dum ka sniehdoh, bad ka dei na ka jaidbynriew Garo bad ka nang ruh ban kren bad sngewthuh tang ïa ka ktien Garo. Ka don ïa u shñiuh uba ïong bad ka rynïeng kaba 5 phut.
Halor kane, u SP u la pynmih ïa ka jingpyntip na bynta ban wad ïa ka Sarila bad lada don kino-kino kiba ïohi ne ïoh jingtip shaphang jong ka, kin sngewbha ban pyntip sha ki thanat kiba jan eh jong ki.
Na ka liang utei u heh pulit u la dep ruh ban pyntip sha baroh ki thanat jong ka Jylla bad ki Jylla kiba marjan na ka bynta ban wad ïa ka Sarila Sangma.
