Shillong, K’Lyngkot 05
Hadien ba ka Hynñiewtrep National Liberation Council (HNLC) ka la rai ban weng noh na ka jingïakren ïasuk, ka Voice of the People Party (VPP) ka la kynthoh ïa ka Sorkar Jylla namar ka jingbym shimkhia jong ka halor ka mat kren ïasuk bad ka seng (HNLC).
“Lada ngi peit ïa ka jinglong jong ka Sorkar, nga ïohi ba kam da i kwah than eh. Ka jingtyrwa ban kren ïasuk ruh ka wan hi na ka HNLC hynrei ka Sorkar kam da i don mon,” ong u nongaiktien ka VPP, Dr. Batskhem Myrboh.
Haba pynkynmaw ba ka Sorkar Pdeng kumjuh ka Sorkar Jylla ki la ïasoi teng ïa ki soskular ïasuk bad ki kynhun lehnoh, u Dr. Myrboh u la ong, “Lada lah ban ïasoi ïa ka soskular halor ka suk ka saiñ bad kiwei-kiwei ki kynhun lehnoh, kam don jingeh ban leh lang kumjuh.”
Haba kdew ba ka mat halor ka jingïakren ïasuk ka long ban pynkut noh ïa ki kam lehnoh, u nongaiktien ka VPP u la ong ba ka Sorkar Jylla kam i don kano-kano ka jingshimkhia haba ïadei bad kane ka bynta.
“Ka jingweng noh jong ka HNLC na ka jingïakren ïasuk ka long kaba sngewsih,” u la ong.
Na ka liang ka VPP ka kyrpad ruh ïa ka Sorkar Pdeng, Sorkar Jylla bad ka HNLC ban bteng biang ïa ka jingïakren ïasuk khnang ban wanrah ïa ka shong suk shong shngaiñ ha ka Jylla.
“Ka Sorkar ka dei ban shimkhia ïa kane khnang ba ka jingïakren ïasuk kan bteng biang. Ngim kwah ba ka Jylla kan mad ïa ki kam lehnoh,” u la ong.
U Dr. Myrboh u la ban jur halor ka jingdonkam jong ka suk ka saiñ na bynta ka roi ka par jong ka Jylla.
Haba kylli halor ki jingdawa jong ka HNLC, u nongaiktien ka VPP u la ong ba ka Sorkar kumba ka leh ïa kiwei-kiwei ki kynhun lehnoh kiba wan sha ka miej ïakren, ka dei ban leh lang kumjuh na bynta ka HNLC.
“Kan eh aïu ban pdiang ïa ki jingdawa haba ïa kiwei lah,” u la ong.
Ka Hynñiewtrep National Liberation Council (HNLC) ha ka Sngi Balang ka la pynbna ba ka la weng noh na ka jingïakren ïasuk kaba dang ïaid mynta bad ka Sorkar Pdeng lem bad Sorkar Jylla namar ka jingbym lah ban pynurlong ïa ki jingdawa jong ka seng.
Katei ka rai ka la wan lyngba ka shithi kaba ki nongïalam ka seng ki la phah sha ka tnad kam pohïing ka Sorkar Pdeng lyngba u nongaibuit ka tnad (MHA) ka Thaiñ Shatei Lam Mihngi, u A.K. Mishra.
Ïa katei ka shithi ba la soi da u Chairman cum C-in-C (Bobby Marweiñ) bad General Secretary cum Publicity Secretary ka seng, Bah Saiñkupar Nongtraw la phah ruh sha u Myntri Rangbah ka Jylla, Myntri ka tnad kam pohïing ka Sorkar Jylla bad ki ksiang – Bah P.S. Dkhar bad Bah Sadon K. Blah.
