Nongstoiñ, K’Lyngkot 05
Uwei u rangbah u la khlad noh hadien ba u la shah shoh ha la u jong u bahaïing ha ka shnong Nongdaju kaba hap ha West Khasi Hills.
“Ngi la ïoh pdiang ïa ka ejahar na u Bah K. Rashir, Sardar ka Shnong Nongdaju mynta ka sngi ba ha ka 5 tarik, K’Lyngkot, 2024 ha ka por kumba 5.30 baje janmiet, uwei u briew ba don jingduna ha ka bor pyrkhat ba la tip kyrteng kum u Satly Armora (50 snem ka rta) khun u (L) Solin Shyrkon na ka shnong Nongdaju u la shoh ïa la u jong u bahaïing, Bah Columbus Wahlang (40 snem ka rta) khun jong u (L) T. Daju na ka shnong Nongdaju ha kaba u la mynsaw jur bad la pynkit noh sha Riangdo CHC,” ong u SP ka WKH, B. Marak.
Utei u heh pulit u la ïathuh ruh ba hadien kane, utei u briew u la khlad noh namar ki jingmynsaw ha Riangdo CHC.
Haba ïadei bad kane, ki jingdonkam ba ïadei bad ka aiñ ki dang ïaid shakhmat.
