Jowai, K’Lyngkot 05
U Deputy Commissioner ka West Jaiñtia, u Bah B.S. Sohliya, IAS uba long ruh u District Election Officer, West Jaiñtia Hills u la sam ïa ki ‘Final Electoral Roll’ sha ki nongmihkhmat jong ki seng saiñ pyrthei na ki 4 tylli ki Constituency ba hap ha West Jaiñtia Hills kiba kynthup ïa ka 1-Nartiang (ST), 2-Jowai (ST), 3-Raliang (ST) bad ka 4-Mowkaiaw (ST).
Ïa kine ki ‘Electoral Roll’ la sam ha ka jingïalang ha Conference Hall ka DC Office ha ka jingdonlang ka Kong B. Blah, Additional Deputy Commissioner, (Election), ka Kong D.V. Lyngdoh, ADC-West Jaiñtia Hills bad ka Kong HML Kynta, ADC-West Jaiñtia Hills nalor ki nongmihkhmat na ki seng saiñ pyrthei.
U Deputy Commissioner u la pyntip ba ïa ka ‘Final Electoral Roll’ la pynbit pynbiang katkum ka Registration of Electors Rules, 1960 da kaba kheiñ ïa ka 01-01-2024 kum ka tarik jong ki nongthep ‘vote’ kiba la dap 18 snem rta kaba tip kum ka ‘Qualifying Date’.
Ha kaba ïadei bad ka jingpyndonkam ïa ki kor EVM, ka Kong B. Blah, Additional Deputy Commissioner (Election) ka la pyntip ba kito kiba kwah ban tip ki lah ban wan sha ka ophis treikam DC Jowai ha ki kynta long trei ban ïoh jinghikai kumno ban pyndonkam ïa ki kor EVM (Electronic Voting Machine) bad VVPAT. Ka la pyntip ruh ba ka kali ‘Demonstration Van’ kan leit sha man ki shnong ban ai jinghikai ïa ki paidbah kumno ban pyndonkam ïa ka kor EVM bad VVPAT.
Na kitei ki 4 tylli ki Constituency, ki nongthep vote na ka 1- Nartiang (ST) ki don 45,375 ngut kynthup 22,328 ngut ki shynrang bad 23,047 ngut ki kynthei.
Na ka 2- Jowai (ST) baroh ki nongthep ‘vote’ ki don 41,345 ngut ba kynthup ïa 19,464 ngut ki shynrang bad 21,881 ki kynthei.
