Shillong, K’lyngkot 05
U MLA ka NPP na Mawkynrew konstitwensi u Bah Banteidor Lyngdoh um pat kwah ban ong eiei halor ka rai jong ka Hynñiewtrep National Liberation Council (HNLC) ban nym ïakren ïasuk shuh bad ka sorkar jylla lem bad ka sorkar India.
Kum ban shu pynkynmaw u Bah Banteidor Lyngdoh u dei ruh u dkhot barim ka HNLC bad u la shah jied kum u MLA ka Mawkynrew konstitwensi la arsien kynthih hynrei um kwah ban kren eiei halor ka rai sangeh ïakren ïasuk ka HNLC.
Halor ka jingshah byrngem u MLA ka Sohra konstitwensi u Bah Gavin M Mylliem ha ka seng HNLC uba dei u MLA uba la jop lang na ka seng PDF ha u snem 2018 bad snem 2023, u Bah Banteidor um kwah ban ong eiei hynrei un sa ai jingkren ha kine ki sngi ban wan.
Nalor nangta u Bah Banteidor u la ong ba un hap ban wad jingtip shwa na ka sorkar halor ka jingsangeh ïakren ïasuk ka HNLC.
U Bah Banteidor bad u Bah Gavin hadien ba ki la jop na ka PDF ha u snem 2023 ki la khylliap lama noh ïa ka PDF bad pynïasoh pura noh sha ka NPP kaba bat ïa ka bor synshar ha ka jylla hapoh ka jingïalam u Conrad K Sangma kum u Myntri Rangbah.
Kum ban shu pynkynmaw biang, ka HNLC ka la byrngem ïa u MLA ka Sohra konstitwensi u Bah Gavin M Mylliem halor ka jingrai ka sorkar jylla ban khang noh ïa ka MCCL kaba don ha Mawmluh kaba dei ka karkhana pynmih dewbilat kaba la slem hapoh ka jylla.
Ka jingweng ïakren ïasuk ka HNLC ka dei namar kam shym la urlong ki mat jingdawa ba kum ka seng ka la buh hakhmat ka sorkar.
