Sohra, K’lyngkot 05
Hadien shisngi arsngi ka jingmaham kaba kyndit kynsan ka la mih lyngba ki jingthoh ïa kiba la tah ha ki kynroh bad hakhmat ki dukan ha kylleng ki thaiñ jong ka Sohra kaba la maham ïa kino kino ki briew ba kim dei ban buh nongtrei da ki bar jylla hapoh kitei artylli ki thaiñ. Kum katei kajuh ka jingthoh la tah sa hapoh Ichamati bad thaiñ Shella kata ha Saikarab bad ha Jatap bad kumjuh ha kiwei kiwei ki shnong.
La ïohi ba ha katei ka jingthoh la byrngem shai ba kino kino ki trai shnong jong ka thaiñ Sohra bad Shella kiba buh nongbylla lane nongtrei da ki bar jylla hapoh kine ki thaiñ baroh kawei ki dei ban pynmih noh ïa ki kloi lym kumta lada kim pynmih bad jia eiei ïa ki, kitei ki trai kin hap ban shim ïa ka jingkitkhlieh bad ha katei ka jingmaham la thoh ruh ba katei kam dei tang ka jingthoh.
Shuh shuh la ïohi ruh ha katei ka jingthoh ym shym la don mano-mano ba soi kyrteng bad ym shym don ba tip satia mano ba la wan ban tah ïa kitei ki jingthoh ha ki dukan. Lah ban sngewthuh ba ki briew kiba la wan tah ïa kitei jingthoh ki la wan ha ka por bym don briew ne ha ka por ba ym don ba ïohi ïa ki.
Na ka liang ki pulit haba ïohi ïa kine ki jingmaham kiba la tah ha ki kynroh bad hakhmat ki dukan ha Sohra, ki la leit ban tar noh ha ka 5 tarik u mynta u Kyllalyngkot.
Na ka liang ki nongshong dukan kiba don hapoh kitei ki thaiñ ki la ïathuh ba kim tip satia mano ba la wan ban tah ïa kine ki jingthoh hynrei na ka liang ki pulit ki la wan ban tar noh ïa ki na kitei ki jaka.
