Shillong, K’lyngkot 05
Ka Sorkar Jylla ka la nang pynkhreh na ka bynta ka jingwan jngoh ka President ka ri ka Droupadi Murmu sha kane ka Jylla mynta u bnai bad na ka liang ka tnat pulit ka la pan shuh sa kumba khyndai pyrton ki pulit pahara ka Sorkar Pdeng ban pahara ha kane ka nongbah Shillong.
Katkum ka jingpynkhreh, ka President kan wan sha Meghalaya ha ka 15 bad 16 tarik mynta u Kyllalyngkot ha kaba kan leit plie ïa ka Meghalaya Games ha Tura ha ka 15 tarik bad ha ka 16 tarik pat kan wan buh mawnongrim ha nongbah Shillong ban tei ïa ka Shillong Ropeway Project kaba la mang pisa ban tei kumba T.138 klur.
Ka tyllong khubor na ka tnat pulit ka ïathuh ha ka sngi Thohdieng ba ka President kan leit shwa sha Tura bad la pynkhreh ïa ki bor pahara na ka bynta ka jingwan jong ka, nalor ka jingpynkhreh ïa ka Meghalaya Games ka ban sdang ha ka 15 tarik bad kan kut ha 20 tarik mynta u bnai.
La ïathuh ba ki heh pulit ryngkat bad ki ophisar Sorkar bad ki bor pynïaid district ka East Khasi Hills district ki la ïakynduh lang ha ka sngi Thohdieng ban ïakren shaphang ka jingwan ka President.
Kumba 3,000 ngut ki ‘rang bad ‘thei ïalehkai kin ïashimbynta ha ki jingïalehkai bapher bapher ha kaba la pynbeit ban don kumba 22 jait ki jingïalehkai.
Ka Shillong Ropeway Project, ka dei shibynta ban kyntiew ïa ka kam jngohkai ha ka Jylla bad ka jingmang pisa ka long kumba T.138 klur ha kaba yn tei ïa ka Lower Terminal Point (LTP) ha Rait Laban bad ïa ka Upper Terminal Point yn tei ha Lum Shyllong.
Kin don bun bynta ki jingtei jingshna kiba kynthup ïa ki jaka shongkai pyngngad bad kiwei kiwei ki jingdonkam na ka bynta ki paidbah kiba pyndonkam ïa ka ropeway ban leit kai sha Lum Shyllong bad haba wan hiar na Lum Shyllong sha nongbah Shillong.
