Shillong, K’lyngkot 05
Ki nongñiah kali ‘Tourist’ kiba don hapoh ka synjuk jong ka All Khasi Meghalaya Tourist Taxi Association (AKMTTA) kiba kamai na Shillong sha Assam ki la sangeh kamai naduh ka por mynstep jong ka 5 tarik mynta u Kyllalyngkot bad ki la khang ruh ïa ki kali ‘Tourist’ kiba wan na Assam kum ka dak ka jingïashimbynta lang ha ka Bharat Bandh kaba ki nongñiah kali ha baroh kawei ka Ri India ki sangeh kamai.
Ka synjuk ka la pynlong ïa ka jingbat ïa ki kali Tourist na Meghalaya ban leit sha Assam ha ki bynta jong ka Upper Shillong, Umïam bad Byrnihat naduh ki por mynstep. La ïohi ruh ba na ka liang ki pulit ka jylla ki la sdang ban pahara ha ki katto katne ki bynta jong ka sor Shillong namar ba ki nongñiah kali Tourist ki la sdang ban bat ïa ki kali Tourist ïoh lehse ka mih kano-kano ka huri-hura.
Kane ka jingsangeh kamai kali Tourist kan neh kumba 48 kynta kum shibynta na ka jingïakhih ha kylleng ka Ri kum shibynta ban pyrshah ïa ki kyndon pynshitom kiba ka sorkar India ka la pynmih ban pynsaja tyngeh ïa kito kiba phet krad na ka jaka lada ki la tynrah ïa ki briew ha surok bad phet lane ka aiñ “Hit and Run”. Kane ka aiñ ka ong, lada ki nongñiah kali ki tynrah briew bad ki phet kin hap ban shong patok haduh 10 snem kynthih ryngkat bad ka kuna kaba T. 7 lak.
Kumta halor kane ka bynta, na ka liang ki nongñiah kali ha baroh kawei ka Ri India ki la khot noh da ka Bharat Bandh ban pyrshah ïa kane mukotduma.
Na ka liang ka synjuk ka la ong ba kam pynthut satia ïa ki nongwan jngohkai pyrthei hynrei ka bat tang ïa ki nongñiah kali namar kane ka dei tang ka jingeh jong ki draibar.
Haba ïoh ban ïakren bad u Bah Ricaldinus Dohling, u President ka All Khasi Meghalaya Tourist Taxi Association (AKMTTA), u la ong ba na ka liang ki nongñiah kali ‘Tourist’ naduh mynstep ki la bat ïa ki kali ha ki jaka bapher bapher kiba la wan na Assam bad la phah sangeh khnang ba kin lait na kino kino ki jingjia shah kawang maw ha kum kine ki por ba dang sangeh kamai.
“Kane ka jingmih jong ngi sha surok ban ïabat ïa ki kali Assam ban phah leit phai noh shapoh Assam ka long beit ba ngi ïasnohkti lang bad ki Assam, ngi sngewtynnad ïa kaei kaba ki ïakhih bad ngi don bynta bad ki namar ngi ruh ki para dkhot kiba wan bad leit sha Guwahati manla ka sngi, lyngba kane ka jingïadon ryngkat bad ki Assam ka mut ngi ïoh ïa ka jingkyrshan na ki Assam ruh ha kano kano ka por ba ngi donkam”, la ong u Bah Dohling.
U Bah Dohling u la ong ruh ba ki kali shimet ki lah ban leit ban wan sha Assam hynrei ki kali ‘Tourist’ ki dei ban ïatreilang. Kane kan dang bteng haduh ka sngi Saitjaiñ ka 6 tarik mynta u Kyllalyngkot.
