Shillong, K’Lyngkot 05
Ka District Magistrate ka East Khasi Hills, ka Kong RM Kurbah, ha ka 3 tarik Kyllalyngkot ka la pynbna ba ka la ïoh jingtip ba ka don ka jingtih maw be-aiñ na ki sharing lum bad ka jingkhlong shyiap na ki wah ha ki bynta bapher-bapher jong ka East Khasi Hills khamtam ha Sohïong, Mawblei bad Umphyrnai, bad kane ka la ktah ïa ki tyllong umbam umdih ha ki jaka ba marjan.
Ha ka kyrwoh, ka Kong Kurbah ka la ong ba ka don ka hukum na ka National Green Tribunal, Principal Bench, New Delhi kaba khang ïa ki riewshimet, kompani bad kiwei ban tih bad khlong shyiap na ki wah na kano kano ka bynta jong ka Ri khlem da ïoh shwa ïa ka Mining Licence/Quarry Permit bad kiwei ki syrnod ba donkam na ka Ministry of Environment. Forest & Climate Change, Sorkar India.
Ka Kong Kurbah ka la ong ba ka jingleh pathar ha ka jingtih bad jingkhlong ka la wanrah ïa ka jinghap jong ki maw, jingtuid jong u shyiap bad kiwei pat ki marpoh khyndew sha ki wah bad nalor ki jaka ba long lum ba kane ka wanrah ïa ka jingjulor ïa ki jingthung jingtep, tyllong umbam umdih, bad ïa ki jingthaw ba im ba don ha ki im.
La ong ruh ba kiba bun ki wah ki la jaboh namar ka jingtih maw bad jingkhlong shyiap bad kane ka pynlong ïa ka um ba kan ym long shuh ban pyndonkam ban duh da ki briew.
Namar ka jingdonkam ban bud ïa ka hukum jong ka National Green Tribunal ha East Khasi Hills District, ka Kong Kurbah ka la pynbna ba la pynjari da ka kyndon 144 Cr.P.C. bad la maham ba ym dei ban tih maw na ki sharing lum lane ban khlong shyiap na ki wah khlem da ïoh shwa ïa ka Mining Licence/Quarry Permit bad kiwei ki syrnod na ki bor ba dei khmih.
Kane ka hukum ka la treikam naduh ka 3 tarik Kyllalyngkot, 2024.
