Shillong, K’Lyngkot 05
U MDC ka BJP na Tura, u Bernard N. Marak u la ujor sha u Myntri ka tnad kam pohïing ka Sokar Pdeng, DGP ka Jylla bad S.P. ka South Garo Hills halor ki kam khaïi dewïong be-aiñ hapoh katei ka distrik bad kyrpad ban leh eiei mardor ban pynsangeh ïa baroh ki kam be-aiñ ba ïadei bad u dewïong.
“Nga kwah ban pyntip sha phi halor ka jingshyrkhei haba ïadei bad ka jingkhaïi dewïong be-aiñ kaba jia im-im peit-peit hapoh ka Jylla. Ki trok ba kit dewïong palat pud khlem ki kot ki sla kiba biang ki ïaid laitlan mynmiet da kaba siew ïa ka bai rung kumba T.1,25,000/- na bynta kawei ka trok – ka bym don jingkheiñ da ka Sorkar bad khlem da siew ïa ka khajna sha ki Autonomous District Council (ADC) ne bud ïa ki jingbthah jong ka ïingbishar ba hakhlieh duh ka ri, ka long ka jingpynkheiñ ïa ka hukum ka ïingbishar ba hakhlieh duh ka ri ba la pynmih ha ka 03.07.2019, bad ka jingshim kabu ïa ki kyndon jong ka Khyrnit ba 6 ba Riti Synshar ka Ri naba baroh ki distrik ka Jylla ki hap hapoh ka ‘Hill Provision’,” ong u Marak ha ka jingujor.
U la kynnoh ruh ba da ki spah tylli ki trok ki kit dewïong be-aiñ na Era Aning bad Jadigittim bad ka don ruh ka jingpynhap be-aiñ kaba ju jia ha kitei kijuh ki jaka, ha kawei ka liang kaba long ka jingpynkheiñ ïa ka hukum jong ka ïingbishar ba hakhlieh duh ka ri ba la pynmih ha ka 03.07.2019.
Haba kdew ba ka don ka ejahar haba ïadei bad katei ka bynta ba la ujor ha thanat Nongalbibra, u Marak u la ong ba dei ban tohkit bniah ïa katei ka bynta naba la kit ïa u dewïong na ka ‘depo’ ha Era Aning bad Jadigittim kiba hap hapoh thanad Nongalbibra, South Garo Hills.
Shuh shuh u la bynrap ba ka daw jong ka jingbym leh eiei ki pulit ka buh shibun ki jingartatien bad kumta u la kyrpad ban leh eiei noh mardor haba ïadei bad katei ka liang bad ban pynsangeh shi syndon ïa baroh ki kam be-aiñ ba ïadei bad u dewïong kumjuh ban burom ïa ka hukum ka ïingbishar ba hakhlieh duh ka ri.
