Shillong, K’Lyngkot:
Ka Election Commission (EC) kan sa sdang ban peit bad khmih bniah ïa ka jingpynkhreh jong ki jylla na ka bynta ka ilekshon sha ka ïingdorbar Lok Sabha ka ban sa long mynta u snem.
Kane ka jingsdang ban leit jngoh da ka ophisar jong ka Election Commission ka Ri kan sdang naduh ka taïew ban wan bad kan hiar shwa sha Andhra Pradesh bad Tamil Nadu.
Kane ka commission hapoh ka jingïalam jong u Chief Election Commissioner u Rajiv Kumar bad ruh u Election Commissioners u Anup Chandra Pandey bad u Arun Goel kin sa don ha Andhra Pradesh bad Tamil Nadu hapdeng ka 7 haduh 10 tarik mynta u bnai.
Lah ban pynkynmaw ruh ba na ka liang jong ki Deputy Election Commissioners ki la dep ban leit jngoh sha jan baroh ki jylla ban peit bad khmih halor ka jingpynkhreh ïa ka ilekshon Lok Sabha. Ka ju dei ka bynta na ka bynta ka EC ba kan leit ban jngoh ïa ki jylla la ka dei na ka bynta ka ilekshon MLA ne MP na ka bynta ban ïakynduh ïa ki seng saiñ pyrthei bapher bapher, ki heh pulit bad ki bor pynïaid district bad ki briew ba dei khmih bad kane ka kam.
Hynrei kumba ka long mynta, ym pat lah ban tip la ka Election Commission kan hiar ban leit jngoh lut sha baroh ki jylla bad ki union territory bad ka lah ruh ban nym leit shuh sha ki jylla, kiba dang shu dep pynlong ïa ka ilekshon MLA dang shen.
