Shillong, K’Lyngkot 07
Ka Voice of the People Party (VPP) ka la byrngem ban mih sha surok bad ïakhih pyrshah ïa ka Sorkar MDA lada kam thung biang ïa ki ophisar ba shah weng kam jong ka Lokayukta.
“Lada kane ka Sorkar kam thung biang ïa ki ophisar ba shah weng kam, ka seng kam banse ban mih sha surok bad pynlong da ka jingïakhih pyrshah ïa ki kam bamsap jong ka Sorkar MDA hapoh ka jingïalam ka NPP,” ong u President ka VPP, Bah Ardent M. Basaïawmoit ha ka kyrwoh khubor.
U la ong ruh ba ka khubor ba dang shen halor ka jingweng kam ka Sorkar MDA ïa ki Investigating Officer-IO (kiba shakri ha ophis ka Lokayukta) ban ïada ïa ki nongmihkhmat ‘riewsaiñ pyrthei ba kynnoh bamsap kiba dei jong ka NPP ba kynthup ïa u bahaïing ba ïajan jong u Myntri Rangbah ka Jylla ka long kaei-kaei kaba hap ban pynrem bad pyrshah jur da baroh hapoh ka Jylla.
“U Myntri Rangbah u dei ban sangeh ka jingtuklar haba ïadei bad ka jingtreikam jong ka ophis ka Lokayukta kaba ngeit ba ka long kaba laitluid bad ka bym don jingtieng. Ki paidbah ka Meghalaya ki dei ban ïoh ïa ka Jylla kaba lait na ka bamsap bad ka synshar-khadar kaba bha,” ong u Bah Basaïawmoit.
Na ka liang utei u nongïalam uba long ruh u MLA ka seng, u la bynrap ba kum ka liang pyrshah kaba don ka jingkitkhlieh, kan pyntikna ba kane ka Sorkar kan ym ñiew beiñ ïa ki paidbah hynrei kan burom ïa ki.
Katkum ki khubor ba la mih dang shen, la ong ba 3 ngut ki IO ba kynthup ïa u Director of Inquiry & Prosecution, Bah J. Rymmai, lem bad ki Enquiry-cum-Investigating Officer – R. Pde bad Anil K. Sangma, ki la shah weng kam lyngba ka kyrwoh ha ka ‘WhatsApp’. Dei kitei ki 3 ngut kiba la thad madan ïa ka jingkynnoh bamsap kaba la kot da ki klur tyngka ba la kynnoh donkti da uwei u MLA, Sanjay A. Sangma, uba dei ruh u kynum jong u Myntri Rangbah ka Jylla.
Katei ka kam bamsap kaba la kynnoh ka dei halor ka jingshna ïa ka Hostel na bynta ki MDC ka Garo Hills Autonomous District Council (GHADC) ha Tura. Kane ka projek ka shong dor palat T.6 klur.
Hadien ka jingtohkit, ka ïingbishar jong ka Lokayukta ka la mudui pyrshah ïa 9 ngut ki dkhot EC barim jong ka GHADC, 2 ngut ki kontraktor, u Sanjay Sangma bad Principal Secretary barim ka GHADC.
Nalor katei ka jingtohkit, la bud sa ka jingujor na u nongtrei mon sngewbha, u Kingstone B. Sangma. Ïa katei ka MDC Hostel, la bei tyngka da ka Sorkar Pdeng.
Kumban shu kdew hangne, ka Sorkar ka la thung ïa 4 ngut ki IO ka Lokayukta ki ban bujli ïa ki 3ngut kiba shah weng kam ha u bnai ba la dep.
U Chairperson ka Lokayukta, Bah Bhalang Dhar halor ka jingai jingmut ka Sorkar Jylla u la thung ïa u Bah Israel W. Ingty kum u Director ka Inquiry Wing lem bad 3 ngut ki dkhot – Challang G. Momin, John Clitzer bad Banïateilang Diengngan.
