Khliehriat, K’Lyngkot 07
Ka KSU Narpuh Circle ka phah ïa ka kyrwoh jingsngewlem sha ki bahaïing ha sem jong u (L) Chiang Dhar na ka shnong Umkiang Elaka Narpuh uba la shah pynïap dusmon ha ki suba nong Bangladesh ha ka 6 tarik mynta u bnai ha ka por kumba 3:30 mynsngi.
Ka KSU ka la ong ba katkum ka jingïathuh jong ki trai shnong, ki 2 ngut ki trai shnong – Bah Chiang Dhar na Umkiang bad u Rahul Pohtam na Lumsoski ki la leit sha bri kwai ban ap ïoh don ki nong Bangladesh kiba wan tuh kwai, hynrei kitei ki 2 ngut ki la shah kthong ha ki nong Bangladesh kiba wan da ka kynhun ha kaba u Rahul Pohtam u la lait im katba u Chiang Dhar u la shah pom dusmon da ki wait ha ban da khlad.
Ka KSU ka la ong ba kane ka jingjia ka la jia hajan ka ktem jong ki shipai BSF kaba kyrteng ka Lamasaki kaba jngai tang 500-meter na katei ka jaka ba jia.
“Kane ka jingjia ka la pynsuhjer ïa ki paradoh parasnam jong kito ki thaiñ namar kum kine ki jingjia shah thombor ki jia na ka por sha ka por ha kaba lah ban pynkynmaw ba dang ha kine ki khyndiat bnai, ka la jia ka jingshah pynïap dusmon jong kawei ka longkmie kaba la 45 snem kaba na ka shnong Donaskur ha u nong Bangladesh ha kaba na liang ka tnad pulit kim shym la ïoh haduh mynta,” ong u kyrwoh ka KSU.
Ka seng KSU ka pynrem jur ïa katei ka jingleh ‘riewkhlaw kaba shim ïa ki mynsiew briew.
Ka seng ka dawa ruh na ka Sorkar Jylla ban pynngat mukotduma ïa baroh kitei ki ‘riewthrang snam bad phah pynkynriah noh ïa ki BSF kiba shong beaiñ ha jingkieng Sonapyrdi bad kito kiba shna ktem ha markhap shnong Dona bad Ratacherra sha khappud.
Ka KSU ka dawa ban phah pahara ïa ki shipai BSF sha khappud bad ym ban shong ha ‘highway’ ban ïoh leh tohmet ïa ki paradoh-parasnam.
“Ka Sorkar Jylla ka dei ban shimkhia ban ïada ïa kum kine ki jingshah thombor ki paradoh-parasnam na ka por sha ka por, kam dei ban shu sngap jar,” ong ka kyrwoh ka seng.
