Shillong, K’lyngkot 07
Ki nongtrei bylla hapoh ka skhim Mahatma Gandhi National Rural Employment Guarantee Scheme (MGNREGS) ha Meghalaya ki don 12,31,603 ngut, bad kito kiba la pynïasoh Aadhaar ki long 7,30,437 ngut ha kaba ka Sorkar Pdeng ka la bthah ba baroh ka jingsiew bainong hapoh jong kane ka skhim ka dei ban ïaid lyngba ka Aadhaar-Based Payment System (ABPS) naduh ka 1 tarik jong une u snem thymmai.
Kane ka jingbthah ka Sorkar Pdeng ka lah ban buh jingeh ïa ki lak ngut ki nongtrei bylla sngi hapoh ka skhim namar ki dang don kiba khlem pat don wat ïa u Aadhaar, khlem pat da ïakren ïa ka jingpynïasoh ïa u Aadhaar bad ka Job Card jong ki.
Katkum kane ka rukom siew bainong, la ong ba baroh ki nongtrei bylla ki hap ban pynïasoh ïa u Aadhaar bad ka job card jong ki khnang ba ka bainong sngi ba ki trei bylla hapoh jong kane ka skhim kan poi sha ka jaka kynshew pisa jong ki.
Ka tyllong khubor ka ïathuh ba na ki 12,31,603 ngut ki nongtrei bylla hapoh ka skhim, kiba la pynïasoh Aadhaar ki don 7,30,437 ngut kaba long 59 na ka 100.
La ong ba ki don ruh kumba 29.11 % kiba la biang ban pynïasoh ïa u Aadhaar bad ka Job Card jong ki.
La sngewthuh ba ki dang don ym duna ïa ka 2 lak ngut kiba khlem pat dep ban leh ïa kane bad lada ka long kumta, kan sa mih jingeh ban poi ka bainong sngi sha ka jaka kynshew pisa jong ki.
Ka skhim MGNREGS ka dei kawei na ki skhim ka Sorkar Pdeng kaba kham myntoi bha ki paidbah ha thaiñ nongkyndong namar dei lyngba kane ka skhim ba ki briew ki ïoh bylla ban pyndap ïa ki jingdonkam ha ïing ha sem.
Ka Sorkar Pdeng mynta ka pynbor ba dei ban pyndep 100 na ka 100 ïa ka ABPS na ka bynta kiba don job card bad ki Sorkar Jylla ruh ki shah pynbor ban weng noh ïa kito kiba don job card kiba khlem lah ban pynrung ïa ka rukom bainong lyngba ka jingpynïasoh Aadhaar.
