Nongstoiñ, K’Lyngkot 07
Ha ka Sngi Saitjaiñ, ka Mawrusyiar Youth & Cultural Club (MYCC) ka la ïoh ban pynhap pyrda noh ïa ka jingrakhe dap 50 snem jong ka lane ka Jubili Ksiar ïa kaba la pynlong ha Madan Mawrusyiar, West Khasi Hills.
Ha katei ka sngi, u Bah Vincent H. Pala, MP u la long kum Kongsan, ha ka jingdonlang u R.G.Momin, MLA ka Rambrai kum u Symbud Kongsan, u Sordar ka shnong Mawrusyiar, ki ‘riewrangbah bad kiwei-kiwei. U Kongsan u la ïoh ruh ban plie ïa u maw sah kynmaw jong ka jingdap 50 snem bad la ïoh ruh ban pyllait paidbah ïa ka ‘Souvenir’ bad ka ‘Documentary’ jong ka MYCC bad la ïoh ruh ban ot ïa u ‘cake’ nalor kiwei-kiwei.
“Ka jingdap 50 snem jong ka MYCC, ki mawjam na ka bynta ka 50 snem ka ban dang wan,” ong u MP haba kren kum u kongsan ha katei ka sngi. U la ong ruh, “Ai ba u maw ba ngi buh bad plie mynta un ym leh noh ei hynrei lyngba kane kan don ruh ka jingkut jingmut ba ngin dang lah shuh-shuh ban pynbha ïa ka shnong ka thaw bad ka ri kaba ieid jong ngi.” U la ong ruh ba ha kum kane ka sngi jong ka jingrakhe, ki samla bad ka shnong hi baroh kawei ki dei ban kynmaw ïa ka jingïohi jngai jong ki ‘riew rangbah bad ki samla kiba la lah ban seng ia kane ka Club, 50 snem mynshwa na ka bynta ka bit ka biang bad ka bha ka miat jong ki para samla. Shuh shuh u Bah Pala u la ong ba ki don shibun ki briew kiba riewspah bad kiba stad hynrei ka long lehnoh ei ïa ka jingdon jong ki lada kim noh synñiang sha ka imlang-sahlang bad ban ïa peit bad ïarap lem na ka bynta kiba donkam.
