Shillong, K’lyngkot 07
Ki nongñiah kali na Shillong sha Pynursla shaduh Dawki ki la pynpaw ba ka jingma ka ap ïa ki lada ki ïaid ha riat Rngaiñ ynda ka lyiur kan wan biang namar ïa ka surok kaba la shna la shu ieh khongreng haduh mynta.
Haba ïoh ban ïakren bad ki nongñiah kali kamai na Pynursla bad Dawki ki la pynpaw ka jingsngewkmen haba ïa ka surok la sdang ban shna noh. Pynban mynta haba la ïaid palat lai snem kam pat don dak eiei ban pyndep noh hynrei la ïohi pynban ba ka kompani kaba wan shna ka shu wan pynjot ïa ka surok rim kaba skhem bha.
Ki nongñiah kali na Pynursla ki la ïathuh ba lada bha ka surok ki ïaid tang shi kynta sha Shillong hynrei mynta haba ka la sinew ki ïaid kumba ar kynta bad ka shah khñium ha ki paidbah ba poi slem palat.
Nalor nangta ki la pynpaw ka jingma ïa ka riat Rngaiñ namar kane ka surok ka la dep shim ïa ar ngut ki mynsiem briew ha ka por ba ki shna ha ka por lyiur kaba la dep bad mynta ka don jingma namar ym shym la trei shuh haduh mynta.
Kumta ki la kyrpad ïa u MLA Pynursla Bah Prestone Tynsong uba dei u Symbud Myntri Rangbah uba bat ïa ka tnad PWD (roads) ba un phah maramot ïa ka surok kaba la sniew lada ym pat lah ban shna ïa ka surok kaba la trei da ka kompani.
Katba ki draibar kiba kamai sha Dawki-Shillong ki la ïathuh ba man ka taïew ki hap ban leit beit sha karkhana ban phah shna kali namar ka jingsniew palat ka surok.
Ki la ong ba naduh ba la shna ïa ka surok ka pum-pum ka la long shaba palat tangba kim banse ban kamai namar ki la im ban kamai jakpoh da kaba ñiah kali.
Ki la ong ba ki hap ban kit ïa ki marbam ban ïaid beit ïa ka surok na Pynursla sha Dawki wat la ka surok kaba rit haba la ïeng sa ki trok kit maw namar ym don bos ba kamai sha Dawki.
Ha kajuh ka por ki la pynpaw ka jingsngewdiaw namar ka Dawki ka dei kaba la paw ha ki kam jngohkai pyrthei haba ka don markhap bad ka Bangladesh hynrei sngewlehraiñ ban ïohi ba ka surok ka la sniew palat.
