Jaipur, K’Lyngkot 07
U Myntri Rangbahduh, u Narendra Modi, ha ka Sngi U Blei u la ïashim bynta ha ka jingïalang ba shisien shi snem jong ki heh pulit (Director General/ Inspector General) ha Jaipur.
Ha ka jingkren shaphang ka jingpyntreikam ïa ki lai tylli ki aiñ bathymmai ban teh lakam ïa ki kam beaiñ, u Modi u la ong ba kine ki dei ki jingkylla bakhraw ha ki kam aiñ. U la ong ba ki aiñ bathymmai ki dei kiba la saiñdur da ka jingmut ‘Ki briew hashuwa, ka burom hashuwa bad ka hok hashuwa’ bad ha ka jaka ban treikam da u ‘dieng’ ki pulit mynta ki dei ban trei da ka ‘data’.
U Myntri Rangbahduh u la kyntu ïa ki heh pulit ba kin pyrkhat thymmai bad ba kin pyni ïa ka mynsiem jong kine ki aiñ bathymmai sha ka imlang sahlang. U la ban jur halor ka jingai jingtip ïa ki longkmie bad ki kynthei shaphang ki hok jong ki bad ki jingïada ba ki ïoh hapoh ki aiñ bathymmai.
U la kyntu ïa ki pulit ba kin peit bniah ïa ka jingshngaiñ jong ki kynthei da kaba pynthikna ba kin ïoh ban treikam khlem kano-kano ka jingsyier ‘ha kano-kano ka por ne kano-kano ka jaka’.
Shuh shuh u Myntri Rangbahduh u la ong ba ka long kaba donkam bha ba ki briew kin don ka jingsngew kaba bha shaphang ki pulit. U la ong ba ki thanat ki dei ban pyndonkam ïa ka ‘Social Media’ ban ai jingtip na ka bynta ka bha ka miat jong ki paidbah.
U la ai jingmut ruh ïa ka jingpyndonkam ïa ka ‘Social Media’ ban ai jingtip haba don ki jingjia lynshop ki bor mariang bad ka jingai jingïarap ha kum kine ki khep. U la ong ruh ba dei ban pynlong ïa ki lympung ïalehkai ban pynkhlaiñ ïa ka jingïadei hapeng ki ‘riew paidbah bad ki pulit. U la kyntu ruh ïa ki bor sorkar ba kin leit sah sha ki jaka khappud ban wanrah ïa ka ‘jingïadei’ bad ki briew ha kine ki jaka.
Nalorkata, u Modi u la kren shaphang ka jingseisoh jong ka ‘solar mission’ kaba nyngkong jong ka India – Aditya-L1 bad ka jingpyllait im ba mardor ïa 21 ngut ki briew kiba don ha ka jhad ha duriaw Arabian Sea da ki shipai duriaw ka Ri ha kaba u la ong ba kine ki jingjop ki pyni ba ka India ka dei ka bor kaba dang kiew shaphrang ha ka pyrthei.
U la ong ba ka jingjop jong ka Aditya-L1 ka ïasyriem bad ka jingjop jong ka Chandrayaan-3 Mission. U la ong ruh ba u dap da ka jingsngew sarong shaphang ka jingjop jong ki shipai duriaw ka Ri.
U la ong ba katkum ka jingkiew kyrdan ka India ha ka pyrthei bad ka jingkiew ka bor jong ka ri, ki bor pulit ka India ki dei ban don ka jingkylla sha ka kynhun pulit kaba katkum ka juk mynta khnang ban pynurlong ïa ka thong ban don ka India kaba la kiew shaphrang shuwa u snem 2024.
U Myntri Rangbahduh u la sam ruh ïa ki khusnam Police Medal for Distinguished Services bad u la pynkut ïa ka jingïalang ba lai sngi.
Ha kane ka jingïalang, la wan ïashim bynta ruh da u Myntri Korbar Ri, u National Security Advisor, ki Myntri Khynnah ka tnat Korbar Ri, ki DGP/IGP jong ki Jylla/UT bad ki khlieh duh jong ki kynhun pulit ka Sorkar Pdeng.
Kane ka jingïalang ka la peit bniah ïa ki bynta bakongsan jong ka jingshngaiñ ha ka ri ba kynthup ruh ïa ki aiñ bathymmai, ki rukom treikam ban ïada na ki kam kieng atiar, ki kam pyntriem Left Wing, jingma ba mih ha ki kam Cyber Crime, ki kam ha kylleng ka pyrthei ban ïada na ka jingïaumsnam, bad kiwei kiwei.
