Agartala, K’Lyngkot 07 (UNI)
Ban ïakhun pyrshah ïa ka jingkiew ha ki kam khaïi drok, ka la don ka jingïalang jong ki kynhun pahara bad kiwei bad la pynpaw ïa ka jingsngewkhia halor ka jingkiew ka jingwan u drok na Myanmar sha Tripura, la ong ka kyrwoh khubor na ki shipai Assam Rifles.
Ha katei ka jingïalang, la ïakren halor ka jingpynkhlaiñ ïa ka jingïatreilang hapdeng ki bor bapher-bapher bad ban shna ïa ki lad ki lynti ban ïakhun pyrshah ïa u drok katkum ki kyndon jong ka NDPS Act.
La pynpaw ruh ba hadien ka jingsdang ka jingïakynad ha Manipur ha u Jymmang 2023, ka la don ka jingpynkylla ha ka jingïaid lynti ki nongkhaïi drok bad kiwei ki mar be-aiñ na Myanmar. Barabor, ka lynti ïaid ka dei na Manipur sha Assam.
Hynrei namar ka jingïadei hapdeng ki kynhun Kuki-Zo-Chin ha khappud Mizoram-Myanmar border bad ka jingtreikam ka Free Movement Regime (FMR), la sdang ban pynïaid ïa u drok na Mizoram sha South Assam ban pynpoi sha Tripura. Ka jingïoh kurup drok ha kine ki khyndiat por na katei ka lynti ka pyni ba ka lawei kan long kaba shyrkhei bha ha ki kam khaïi drok.
Nalorkata, ka Tripura ka la sdang ban paw kum ka jylla kaba pynmih bun ïa u kynja lane ‘cannabis’, bad na ka por sha ka por, ki bor pahara ki la ïoh ban kurup bun bah u kynja ba mih na kane ka jylla.
Ha katei ka jingïalang, la ïa pyni jingmut bad ïamir halor kiba bun ki mat kiba ïadei bad ki kam khaïi drok da ka jingthmu ban wanrah ïa ka jingïatreilang hapdeng ki mamla bapher-bapher khnang ban lah ïakhun ïa ka jingkhaïi drok.
