Dhaka, K’Lyngkot 07 (UNI)
Ka seng Awami League ha Bangladesh hapoh ka jingïalam jong ka Myntri Rangbahduh, Sheikh Hasina, ka la jop palat mar shiteng ki konstitwensi ha ka ilekshon sha Parliament.
Kane ka long katkum ki jingpynbna da ka Election Commission na ki bynta bapher-bapher jong ka Ri ha ka miet Sngi U Blei.
Ka Bangladesh ka la pynlong ïa ka ilekshon ha ka Sngi U Blei ban jied ïa ki 299 ngut ki dkhot ka Parliament. Hynrei la hap ban pynsangeh noh ïa ka jingthep ‘vote’ ha kawei na ki konstitwensi na ka daw ka jingkhlad noh uwei u kyrtong.
Ka jingthep ‘vote’ ka la sdang ha ka por 8 baje mynstep bad ka la poi sha kaba kut ha ka por 4 baje janmiet ha ki 42,000 tylli ki jaka thep ‘vote’.
Ha Bangladesh, kano-kano ka seng saiñpyrthei ka lah ban thaw ïa ka sorkar lada ka ïoh palat 151 ngut ki MP.
Katkum ki lad pathai khubor na Bangladesh, la ong ba ka seng Awami League ka la jop ha ki 204 tylli ki konstitwensi katba ka Jatiya Party, kaba ïatreilang bad ka Sheikh Hasina, ka la jop ha ki khyndai tylli.
Lah ban kdew ba ka Bangladesh Nationalist Party (BNP), kaba dei ka seng liang pyrshah ba la ïalam da ka Khaleda Zia, ka la pynbna da ka jingkhangdam mynta ka sngi, bad ryngkat bad kiwei pat ki seng, ka la rai ban ym ïashim bynta satia ha kane ka ilekshon ban jied ïa ki dkhot ka Parliament.
