Tokyo, K’Lyngkot 07 (UNI)
Ka jingïap jong ki briew na ka jingkhie u jumai ba jur ha Ishikawa Prefecture, Japan ha ka Sngi Nyngkong jong u snem thymmai ka la kiew sha ka 128 ngut, ong ki lad pathai khubor ka Japan ha ka Sngi U Blei.
Kumba 560 ngut ki briew ki la mynsaw bad 222 ngut kiwei pat ym pat don jingtip satia halor jong ki, ong ka lad pathai khubor Kyodo.
Ha ka por mynsngi jong ka Lah Sngi U Blei, u jumai uba jur bad uba don ïa ka jingkhlaiñ kaba 7.6 ‘magnitude’, bud sa katto-katne kiba kham rit u la khie hajan ka sor Suzu ha Noto Peninsula kaba ha Ishikawa Prefecture.
Ki jingkhynñiuh ki la ïalam sha ka jingtwa jong ki ïingmala bad ktah ïa palat 23,900 tylli ki longïing ha ka liang ka bording, watla kam shym la don kano-kano ka jingshah ktah jong ki Nuclear Power Plant.
U jumai uba la khie ha ka 1 tarik u Kyllalyngkot, 2024 u long uba jur tam na bynta ka thaiñ Noto Peninsula naduh ba la sdang lum thup ha u snem 1885.
Kane ka jinglynshop mariang ka la ktah ruh ki bynta-bynta ne pynjulor pura ïa palat 1,370 tylli ki longïing bad pynlong ïa palat 30,700 ngut ki briew ha Ishikawa ban kynriah sha ki jaka sah jong ka Sorkar.
Ki kynhun ïada ka Japan ki la phah 5,400 ngut ki nongtrei ban synran lang ha ki kam ïarap.
