Shillong, K’lyngkot 07
Ka jingsam ïa ka skhim sha ki MDC ka Khasi Hills Autonomous District Council (KHADC) kaba kham ïoh bun ka dei ka Sohra konstitwensi ha ka por ba u Bah Titosstarwell Chyne u long kum u CEM bad ka Mawkynrew konstitwensi ha ka por u Bah Martle N Mukhim u bat kum u EM ka tnad roi ka par.
Katkum ka jingïoh lum jingtip na ka pisa ba la mang da ka Sorkar India ka 15th Finance Commission jong u snem 2020-21 kaba dei ka Tied bad Untied kaba kynthup ïa ka jingpyllait pisa kaba nyngkong bad ka jingpyllait pisa kaba ar, kitei ar tylli ki konstitwensi ki kham ïoh bun ka pisa.
U MDC ka Sohra konstitwensi Bah Titosstarwell Chyne uba dei kum u CEM ha kitei ki snem u la ïoh haduh hynriew klur shiphew lak tyngka tam, katba u MDC ka Mawkynrew Bah Martle N Mukhim uba bat kum u EM ka tnad roi ka par u la ïoh haduh saw klur hynñiewphew phra lak tyngka tam.
Katba kiwei ki MDC kiba don ha ka liang synshar ne liang pyrshah kum ka UDP, NPP bad Congress don kiba ïoh 2 klur tyngka tam bad shi klur shiteng bad u MDC ka Nongstoiñ Bah Gabriel Wahlang u ïoh shi klur, arphew lak tyngka ha ka jingbhah skhim, katba uba shah bhah skhim ba tang khyndiat u dei MDC ba shu sieh jong ka Sorkar Jylla u Bah BM Lanong uba ïoh 57 lak, hynñiewphew khyndai tyngka.
Katkum ka jingbhah ïa ka skhim ka Mawlai kaba bun briew tam na baroh ki konstitwensi, u MDC ba mynta u Bah Teibor Pathaw u ïoh ar klur, phra lak tyngka, katba u MDC ka Laban-Mawprem kaba duna briew tam u ïoh ar klur, khatsan lak tyngka tam.
Na ka liang ki MDC kiba mynta ki kwah ba ka Executive Committee ka KHADC kaba la ïalam da u Bah Pynïaid Syiem kum u CEM kin bhah mar katjuh ïa ka skhim sha baroh ki MDC namar kim kwah ban ïohi ba kiwei kin ïoh bun shah katba kiwei kin ïoh khyndiat.
