Shillong, K’lyngkot 07
Ki nongtrei ka Mawmluh Cherra Cements Limited (MCCL) haduh mynta kim pat kren eiei halor ka jingkynnoh ka seng kaba shah ñiew beaiñ ka Hyn-ñiewtrep National Libe-ration Council (HNLC) halor ka jingtroiñ kane ka karkhana pynmih dewbilat, bad halor ka jingtyrwa jong ka ban ai tulop T.25 hajar ïa ki nongtrei kane ka karkhana kiba kloi ban snohkti na ka bynta ki dawbah jong ka seng.
Ki nongtrei ka MCCL ki don ka seng jong ki kaba kyrteng ka Mawmluh Cherra Cements Employees Union (MCCEU).
Kane ka seng na ka por sha ka por ka ju dawa na ka Sorkar ban pyntreikam noh ïa ka skhim shongthait ki nongtrei lane Voluntary Retirement Scheme (VRS) nalor ka jingpynneh ban ai kam ïa ki nongtrei kiba la don lypa ynda shimti da kawei ka kompani lyngba ka jingtreikam kaba shu donbynta lang (joint venture) hapdeng ka Sorkar bad kano-kano ka kompani shimet.
Hynrei naduh ba la pynmih ka HNLC ïa ka jingkynnoh halor ka jingtroiñ ka MCCL khamtam ka jingkynnoh bad phah kitkhlieh tang ïa u MLA ka Sohra u Bah Gavin M Mylliem, bad ka jingkhot ka HNLC ban ai tulop T.25 hajar shibnai, ka seng ki nongtrei ka MCCL kam pat kren eiei haduh mynta.
Ym pat lah ban tip, aïu ki nongtrei ka MCCL ki don ban ong halor kitei ki jingshah kynnoh u MLA ka Sohra bad kaei ki don ban ong halor ka jingkhot ka HNLC ban ïasnohkti lang na ka bynta ka dawbah jong ka seng ha kaba ka kloi ban siew man u bnai T.25 hajar kum ka tulop.
Ha ka 29 tarik Nohprah, 2023, ka HNLC lyngba u General Secretary bad Publicity Secretary jong ka, u Saiñkupar Nongtraw ka la ong ba u MLA ka Sohra u dei ban shim jingkitkhlieh bad hiar shuki halor ka jingtroiñ ka MCCL.
Ka HNLC ka la byrngem ruh da kaba ong, “Kumba ka Sorkar jong phi ka nud ban tep im ïa ka MCCL ngi ruh ngi pynngat ka jingkitkhlieh namar ki kam hi jong phi. Ki nongshet kylla jong ki paidbah ki dei ban shah pynshitom da ka jingïap.
Shuh shuh ka HNLC ka la pynbna syndon ba ka tyrwa sha ki nongtrei ka MCCL ban ïasnohkti bad ka seng, bad kito kiba dei ban ïoh ïa ka jingshah hikai shipai ki dei ban dei hapoh 45 snem ka rta, bad lada ki bteng ban aiti lut na ka bynta ka dawbah ka seng bad nongrim jong ka, yn sa ai ka tulop kaba kham biang.
