Shillong, K’Lyngkot 08
Ka Myntri ka Sorkar Jylla ka Kong Ampareen Lyngdoh ka la pynpaw ba donkam ban pynïaid shakhmat ïa ka jingïakren ïasuk bad ka seng kieng atiar ka Hynñiewtrep National Liberation Council (HNLC).
Ka Kong Ampareen kaba dei ruh ka nongïalam ka seng National People’s Party (NPP) ka la ong, ba ka NPP ka ïeng skhem ban ai jingmut sha ka Sorkar Jylla ïa ka jingdonkam ban pynïaid shakhmat ïa ka jingïakren ïasuk bad ka HNLC.
Haba kren sha ki lad pathai khubor ha ka sngi Nyngkong, ka Kong Ampareen ka la ong, ba watla ka la don katto katne ka jingbym hun bad ka jingbym sngewthuh jingmut hynrei ïa kine kiei kiei baroh donkam ban da pynshisha shwa.
“Kane ka mat ka dei kaba hap hapoh ka jingkhmih jong u Myntri ba khmih ïa ka tnat Kam Pohïing uba dei ruh ha kajuh ka por u Symbud Myntri Rangbah ka jylla uba mynta u dang don ha kiwei pat ki kam bad kaba um pat lah ban ong eiei halor kane ka mat kaba donkam,” la ong ka Kong Ampareen.
“Ngi sngewthuh ba ki la don ki jingbym hun bad jingbym sngewthuh jingmut bad ïa kine baroh donkam ban da pynshisha shwa bad ngin ap ïa u Myntri ka tnat Kam Pohïing ba un wanphai noh shen sha ka jaka treikam khnang ba yn lah ban ai ïa ka jingbatai kaba bniah,” ka la ong.
Shuh shuh ka Kong Ampareen ka la ong ba ka kum ka NPP bad ka Sorkar jylla ki ïeng skhem ha ka nongrim ban pynïaid shakhmat ïa ka jingïakren ïasuk bad ka HNLC bad kwah ban ïohi ba ka dei ban don ka jingïasngewthuh jingmut lang na ka bynta ka jingïakren ïasuk kaban neh shirta.
